Presidenti i Serbisë Aleksandar Vuçiq priti me nderimet më të larta shtetërore para Pallatit të Serbisë presidentin kinez Xi Jinping, i cili ndodhet për një vizitë dyditore në Serbi.
Presidenti kinez është pritur para Pallatit “Srbija” nga anëtarët e kabinetit të Millosh Vuçeviqit dhe guvernatorja Jorgovanka Tabakoviq.
Xi, i shoqëruar nga një delegacion prej 400 anëtarësh, mbërriti në aeroportin e Beogradit të martën në mbrëmje, ku u prit nga presidenti serb Vuçiç dhe kryeministri serb Milosh Vuçeviq, të cilët theksuan "miqësinë e hekurt" të dy vendeve.
“I dashur president Xi, mik i dashur, mirë se erdhe në Serbi”, ka shkruar presidenti serb në Instagram, duke e cilësuar vizitën e dytë të liderit kinez në Serbi në tetë vjet, një nder të madh për vendin dhe njerëzit që e duan sinqerisht Kinën.
“Vizioni i botës që ju përfaqësoni, i ka dhënë frymëzim dhe forcë vendit tonë të vogël, i cili sot me guxim dhe krenari ecën në rrugën e përparimit dhe suksesit”, ka shkruar presidenti i Serbisë.
Qëllimi kryesor i vizitës së Xi është thellimi i bashkëpunimit ekonomik me Serbinë, e cila është partneri më i rëndësishëm ekonomik i Kinës në Ballkan dhe ku ka investime prej disa miliardë eurosh, kryesisht në miniera dhe fabrika, si dhe kompanitë e saj marrin pjesë në projekte të shumta ndërtimi dhe infrastrukture. .
Siç tha presidenti kinez, ai pret që ta shfrytëzojë këtë vizitë si një mundësi për një shkëmbim të detajuar të pikëpamjeve me Presidentin Vuçiq për marrëdhëniet dypalëshe dhe çështje të tjera me interes të përbashkët, për të thelluar miqësinë dhe për të krijuar një plan të ri për zhvillimin e marrëdhënieve dypalëshe.
“Kam besim se kjo vizitë do të jetë e suksesshme dhe do të hapë një kapitull të ri në marrëdhëniet Kinë-Serbi”, tha Xi.
Gjatë vizitës së Xi në Beograd në vitin 2016, të dy vendet nënshkruan një partneritet strategjik dhe vitin e kaluar, gjatë një vizite në Kinë në përvjetorin e dhjetë të nismës kineze "Belt and Road", Vuçiç nënshkroi 18 marrëveshje, duke përfshirë një marrëveshje të tregtisë së lirë që do të hyjnë në fuqi në korrik.
"Kina dhe Serbia kanë miqësi të thellë tradicionale. Marrëdhëniet tona dypalëshe i kanë rezistuar provës së ndryshimit të mjedisit ndërkombëtar dhe janë bërë një shembull i shkëlqyer i marrëdhënieve ndërshtetërore. Që nga krijimi i partneritetit strategjik gjithëpërfshirës në vitin 2016, marrëdhëniet dypalëshe kanë arritur rezultate historike. Vendet janë të lidhura me besim të fortë reciprok politik dhe rezultate të frytshme në bashkëpunim shumë cilësor në 'Brez and Road'”, vlerësoi Xi marrëdhëniet mes dy vendeve.
Pas Francës, Serbia është ndalja e dytë e Xi në vizitën e tij të parë në Evropë në pesë vjet. Pas vizitës në Beograd, ai udhëton për në Hungari, e cila konsiderohet aleati më i madh i Kinës në Bashkimin Evropian.
