Presidenti serb Aleksandar Vuçiq përsëriti se vendi i tij nuk do të vendosë sanksione ndaj Rusisë për shkak të luftës në Ukrainë.
“Serbia mund të ndryshojë qëndrimin e saj për vendosjen e sanksioneve ndaj Rusisë vetëm nëse literalisht i vendoset shpata e Damokleut. Tani për tani, gjendja nuk është kështu”, tha Vuçiq për mediat në Paris pas takimit të tij me presidentin francez Emmanuel Macron.
Ai tha se Beogradi ka duruar për 270 ditë “presionet më të vështira” në historinë moderne serbe që nga fillimi i luftës në Ukrainë.
“Askush nuk e di më mirë se unë, sepse askush nuk ka kontakte kaq të drejtpërdrejta në Evropë dhe në botë si unë. Unë e di më së miri se sa larg mund të shkojmë”, shtoi ai.
Vuçiq anuloi udhëtimin e tij në Egjipt dhe Katar për të marrë pjesë në Forumin e Paqes në Paris këtë të premte dhe të shtunën.
Presidenti serb pritet të zhvillojë gjithashtu takime me shefin e politikës së jashtme të BE-së Josep Borrell dhe Mirosllav Lajçak, përfaqësuesin special të bllokut për Ballkanin Perëndimor.
Objektivi kryesor i bisedimeve janë tensionet me Kosovën.
Serbia është i vetmi vend në Evropë që nuk ka vendosur sanksione kundër Rusisë.
Në Ballkanin Perëndimor, Shqipëria, Kosova, Maqedonia e Veriut dhe Mali i Zi i janë bashkuar BE-së dhe ShBA-së në sanksionimin e Rusisë për luftën në Ukrainë.
