Pas përfundimit të procesit të votimit në Kosovë, ka ardhur edhe reagimi i parë i partive politike pjesëmarrëse në zgjedhjet e gjashta parlamentare pas pavarësisë së vendit. Thuajse të gjitha partitë politike i kanë vlerësuar zgjedhjet si korrekte dhe demokratike, ndërsa kanë interpretuar ndryshe rezultatet e para.
Vetëvendosja: Qeverinë e re e formojmë ne
Në daljen e parë pas zgjedhjeve, kryeministri i Kosovës Albin Kurti, njëkohësisht kryetar i Lëvizjes Vetëvendosje, tha se fitorja e sotme ishte konfirmim i qeverisjes së mirë, ndërsa paralajmëroi formimin e Qeverisë Kurti 3.
“Ky është një konfirmim për qeverisjen tonë të mirë e të mbarë demokratike e progresiste. Koalicioni ynë fitues do ta formojë qeverinë e re, pra Kurti 3”, deklaroi kryeministri i Kosovës Kurti.
“Zgjedhjet ishin të lira, demokratike dhe të ndershme”, tha kryeministri Albin Kurti.
PDK-ja: Qytetarët vendosën për ‘Ma mirë’
Në reagimin e parë pas mbylljes së procesit zgjedhor në Kosovë, PDK-ja thotë se qytetarët kanë votuar “për një Kosovë ‘Ma mirë’, duke aluduar në slloganin e tyre zgjedhor.
“Shumica e njerëzve janë bashkuar për një Kosovë ‘Ma mirë’”, tha Blerand Stavileci nga PDK-ja.
Ai e vlerësoi procesin zgjedhor si korrekt dhe demokratik.
“Sot Kosova dëshmon edhe një herë se është demokraci e pjekur, ku qytetarët vendosin për të ardhmen e vendit tonë”, Blerand Stavileci.
LDK-ja: U dyfishuam krahasuar me zgjedhjet e kaluara
Ka ardhur edhe reagimi i parë i Lidhjes Demokratike të Kosovës, pas zgjedhjeve të sotme parlamentare në Kosovë. Vlerësimi i parë i LDK-së është se janë dyfishuar në krahasim me zgjedhjet e kaluara, ndërsa zëdhënësi i kësaj partie, Besian Mustafa, shprehu bindjen se kryetari i LDK-së, Lumir Abdixhiku, do të jetë kryeministri i ardhshëm i vendit.
“LDK-ja ka së paku dyfishim në krahasim me zgjedhjet e kaluara”, tha Besian Mustafa nga LDK-ja.
Ai falënderoi qytetarët për procesin korrekt zgjedhor të zhvilluar sot.
“Falënderoj të gjithë qytetarët e Kosovës për një proces demokratik e fer në këto zgjedhje”, deklaroi Mustafa.
Haradinaj: Fitoi opozita
Kryetari i Aleancës për Ardhmërinë e Kosovës, Ramush Haradinaj, ka reaguar i pari pas përmbylljes së procesit zgjedhor në Kosovë. Ai vlerësoi se partitë opozitare në Kosovë i kanë fituar zgjedhjet, duke u bazuar në rezultatet e exit poll-eve të organizuara, ndërsa bëri thirrje për bashkëpunim mes partive opozitare për ta formuar qeverinë e re.
“Ajo që më gëzon është fakti se opozita i ka fituar këto zgjedhje. I uroj opozitën për rezultatin e zgjedhjeve”, tha Haradinaj.
Kreu i AAK-së opozitare e vlerësoi procesin e sotëm zgjedhor si ndër më të mirët në Kosovë, ndërsa falënderoi qytetarët për kulturën demokratike.
“Falënderoj qytetarët e Kosovës për kulturën e treguar, vërtet na kanë bërë krenarë sot për mënyrën se si ka vajtur procesi zgjedhor”, deklaroi Haradinaj.
Koalicioni për Familjen: Kauza jonë do të vazhdojë
Eman Rrahmani nga Koalicioni për Familjen tha se presin rezultat më ndryshe nga rezultatet e exit poll-eve, ndërsa theksoi se do të vazhdojë angazhimi për kauzën e Koalicionit për Familjen.
“Kauza e Koalicionit për Familje do të vazhdojë, do të vazhdojë angazhimi ynë politik”, tha Eman Rrahmani nga ky koalicion.
