Çmimi i Bitcoin-it ka pësuar një rënie me 8,02 për qind nga niveli i ditës së hënë pasi presidenti i ShBA-së, Donald Trump, foli për të vazhduar përpara me tarifat e shtyra ndaj Kanadasë dhe Meksikës.
Të hënën, Trump tha se tarifat ndaj Kanadasë dhe Meksikës do të vendosen pasi pauza 1-mujore të përfundojë javën e ardhshme.
"Jemi në kohë me tarifat dhe duket se kjo po ecën shumë shpejt. Ne jemi keqtrajtuar shumë nga shumë vende, jo vetëm nga Kanadaja dhe Meksika. Nga ne kanë përfituar", tha Trump.
Në mëngjesin e sotëm, respektivisht në orën 07:45 GMT, çmimi i Bitcoin-it ishte rreth 88.570 dollarë dhe kapitali i tregut të tij ishte ulur në 1,75 trilion dollarë.
Vëllimi i transaksioneve të Bitcoin-it në 24 orët e fundit ishte rreth 73,6 miliardë dollarë.
Në të njëjtën periudhë, çmimi i kriptovalutës Ethereum gjithashtu shënoi rënie me 12,2 për qind, duke shkuar në 2.484 dollarë.
Çmimi i Bitcoin-it përgjatë muajit janar regjistroi vlerën më të lartë ndonjëherë prej rreth 109 mijë dollarë për shkak të inaugurimit të presidentit Trump.
