Presidenti i Koresë së Jugut, Yoon Suk Yeol, i mbijetoi sot mocionit të shkarkimit për shkak të përpjekjes së tij të dështuar në fillim të kësaj jave për ta vendosur ligjin ushtarak.
Mocioni për shkarkimin e tij nga detyra u paraqit nga gjashtë parti opozitare, duke përfshirë Partinë Demokratike kryesore të opozitës, por ai dështoi pasi parlamenti nuk arriti kuorumin minimal prej 200 ligjvënësish.
Për të kaluar, mocioni i shkarkimit kishte nevojë për mbështetjen e të paktën tetë ligjvënësve nga Partia e Fuqisë Popullore (PPP) të Yoonit për ta arritur pragun minimal prej 200 deputetësh në parlamentin me 300 vende. Në fund, votuan vetëm tre. Pa kuorumin e kërkuar, mocioni i shkarkimit u anulua.
Aktualisht, partitë opozitare gëzojnë mbështetjen e 192 ligjvënësve, përfshirë edhe kryetarin e Kuvendit. Megjithatë, nga 190 ligjvënës që votuan kundër dekretit të Yoonit për ligjin ushtarak gjatë një sesioni urgjent parlamentar gjatë natës të martën, 18 ishin nga PPP-ja.
Mocioni për hetim ndaj zonjës së parë gjithashtu dështoi
Më herët, ligjvënësit në pushtet të PPP-së u larguan nga parlamenti përpara votimit të shkarkimit, pasi morën pjesë në një votim të veçantë që hodhi poshtë një hetim ndaj zonjës së parë Kim Keon Hee.
Mocioni i opozitës për Kimin dështoi me dy vota, me 198 ligjvënës që mbështetën masën, duke përfshirë gjashtë nga partia në pushtet. Megjithatë, ai nuk arriti pragun e kërkuar prej 200 votash për miratim.
Blloku i opozitës protestoi dhe hodhi slogane kur ligjvënësit e PPP-së në pushtet u larguan nga parlamenti pas votimit për Kimin.
Kryetari i parlamentit Woo Won-shik u bëri thirrje ligjvënësve të partisë në pushtet që të kthehen në seancë dhe të hedhin votat e tyre për mocionin e shkarkimit, por pa rezultat.
Yoon, 63 vjeç, i kërkoi falje kombit për përpjekjen e tij të dështuar në fillim të kësaj jave për të zbatuar ligjin ushtarak dhe tha se nuk do të përpiqej ta përsëriste një hap të tillë.
Ai vendosi ligjin ushtarak të martën vonë, por u tërhoq brenda gjashtë orëve.
Paralelisht, ministri në detyrë i Mbrojtjes Kim Seon-ho u takua me komandantët e lartë dhe u tha atyre që të ruanin gatishmërinë emergjente përpara votimit të shkarkimit.
Grupe të mëdha koreanojugorësh u mblodhën sot para parlamentit përpara votimit që kërkonte largimin e Yoonit nga detyra.
Grupe qytetare, grupe të punës dhe studentë mbajtën një seri mitingjesh për shkarkimin e presidentit në zona të ndryshme në kryeqytetin Seul pranë parlamentit, njoftoi transmetuesi KBS.
Një person u ndalua nga policia pasi tentoi të vetëdigjej.
