Ish-ligjvënësi amerikan Matt Gaetz u tërhoq nga nominimi për të qenë Prokurori i Përgjithshëm i ardhshëm i presidentit të sapozgjedhur Donald Trump.
Zhvillimi erdhi në një njoftim befasues ndërsa një panel i Dhomës së Përfaqësuesve po shqyrton publikimin e një raporti kritik në lidhje me akuzat për sjellje të pahijshme seksuale kundër Gaetzit.
Gaetz ishte në Kongresin Amerikan të mërkurën për t’u ulur me senatorët që ishin thelbësorë për konfirmimin e tij për të udhëhequr Departamentin e Drejtësisë. Ai tha se takimet ishin “të shkëlqyera”, por pranoi se emërimi i tij është bërë një “shpërqendrim” për ekipin e tranzicionit të Trumpit.
“Nuk ka kohë për të humbur në një përplasje të kotë të zgjatur në Washington, kështu që unë do të tërheq emrin tim nga shqyrtimi për të shërbyer si Prokuror i Përgjithshëm. Departamenti i Drejtësisë i Trumpit duhet të jetë në vend dhe gati në ditën e parë”, shkroi ai në X.
“Unë mbetem plotësisht i përkushtuar për të parë se Donald J. Trump është presidenti më i suksesshëm në histori. Do të jem përgjithmonë i nderuar që presidenti Trump më nominoi për të udhëhequr Departamentin e Drejtësisë dhe jam i sigurt se ai do ta shpëtojë Amerikën”, shtoi ai.
Ndërkaq, Trump shkroi në platformën e tij të medias sociale, “Truth Social”, se Gaetz nuk donte të ishte shpërqendrim për administratën e tij të ardhshme.
“Unë i vlerësoj shumë përpjekjet e fundit të Matt Gaetzit për të kërkuar miratimin për të qenë Prokuror i Përgjithshëm. Ai po bënte shumë mirë, por, në të njëjtën kohë, nuk donte të ishte një shpërqendrim për administratën, për të cilën ai ka shumë respekt. Matt ka një të ardhme të mrekullueshme dhe mezi pres të shikoj të gjitha gjërat e mëdha që ai do të bëjë”, ka shkruar ai.
Komiteti i Etikës i Dhomës së Përfaqësuesve u mblodh të mërkurën për të diskutuar publikimin e raportit mbi të me akuza për sjellje të pahijshme seksuale pas një hetimi të gjatë, por u bllokua në lidhje me publikimin e gjetjeve.
Paneli përbëhet nga pesë demokratë dhe pesë republikanë. Menjëherë pas diskutimeve të gjata me dyer të mbyllura, Susan Wild, më e larta demokrate në këtë trup, tha se të pesë republikanët votuan kundër publikimit të raportit, duke çuar në një bllokim.
Wild tha se ajo u nxit të fliste në kundërshtim me një marrëveshje për të mbajtur të fshehtë procedurat, sepse kryetari republikan Michael Guest e karakterizoi gabim atë që u shpalos pak pas përfundimit të takimit.
“Kryetari që atëherë e ka tradhtuar procesin duke zbuluar diskutimet tona brenda pak çasteve pas daljes nga komiteti”, tha ajo, duke vënë në dukje se komiteti do të takohet përsëri më 5 dhjetor.
Ligjvënësi demokrat Sean Casten tha se ai do të kërkonte të prezantonte atë që njihet si rezolutë e privilegjuar, e cila do të detyronte Dhomën e Përfaqësuesve të mbante një votim për publikimin e raportit.
Përveç hetimit të gjatë të komitetit të Dhomës së Përfaqësuesve, Gaetz kishte qenë nën vëzhgimin federal për akuzat se ai ishte përfshirë në trafikim seksual të të miturve. Ky hetim u mbyll në shkurt 2023.
Gaetz ka mohuar keqbërjen. Ai dha dorëheqjen befas në fillim të këtij muaji ndërsa komiteti po përgatitej të votonte për publikimin e raportit të tij.
