Kryeministri i Hungarisë, Viktor Orban, deklaroi të premten se për Perëndimin "do të agojë një mëngjes i ri" pas marrjes së pushtetit nga presidenti i zgjedhur amerikan Donald Trump, duke përmbyllur kështu "katër vite të hidhura, të vështira, të dhimbshme dhe të dështuara" të administratës demokratike.
Orban akuzoi administratën e presidentit Joe Biden se "vodhi presidencën nga Donald Trump".
"Po të mos kishte qenë mashtrimi i tyre në vitin 2020, Trump do të kishte mbetur president, dhe lufta midis Ukrainës dhe Rusisë nuk do të kishte ndodhur," tha Orban.
Ai theksoi se administratat demokratike dallojnë nga ato republikane për shkak të bazës së tyre: republikanët kanë një qasje kombëtare, ndërsa demokratët janë "globalistë që imponojnë interesat e tyre përmes organizatave globale".
Orban shtoi se demokratët vënë interesat ekonomike mbi politikën dhe kanë "qëllime të forta për të bërë botën më të mirë".
"Kështu ndodh një valë migrimi dhe kaosi, dhe ata nuk ngurrojnë të përdorin luftën për të arritur qëllimet e tyre, ashtu siç bënë në luftën mes Rusisë dhe Ukrainës," përfundoi Orban, duke cituar burime zyrtare hungareze të publikuara në rrjetet sociale.
