Udhëheqësit kinezë dhe rusë diskutuan forcimin e "bashkëpunimit strategjik" midis vendeve të tyre dhe kontaktet e fundit të Moskës me Uashingtonin të hënën, tha Kremlini në një deklaratë.
Në një bisedë telefonike, Xi Jinping dhe Vladimir Putin shkëmbyen mendime mbi zhvillimin e mëtejshëm të partneritetit gjithëpërfshirës dhe bashkëpunimit strategjik midis dy vendeve, thuhet në deklaratë, duke e përshkruar bisedën si "të ngrohtë dhe miqësore".
“U diskutuan mënyrat e zgjerimit të bashkëpunimit me përfitim të ndërsjellë në fushat e ekonomisë dhe tregtisë, investimeve, kulturës, arsimit dhe sportit”, thuhet në njoftim.
Udhëheqësit konfirmuan gjithashtu orarin e takimeve të ardhshme të nivelit të lartë, duke përfshirë kremtimin e 80-vjetorit të fitores në Luftën e Dytë Botërore dhe samitin e këtij viti të Organizatës së Bashkëpunimit të Shangait.
Kjo ishte biseda e dytë telefonike mes dy udhëheqësve që kur presidenti amerikan Donald Trump mori detyrën muajin e kaluar. Koha e bisedës telefonike përkon edhe me përvjetorin e tretë të luftës së Rusisë kundër Ukrainës, e cila filloi më 24 shkurt 2022.
"Vlladimir Putin e informoi presidentin kinez për kontaktet e fundit ruso-amerikane. Pala kineze shprehu mbështetjen për dialogun midis Rusisë dhe Shteteve të Bashkuara dhe gatishmërinë e saj për të ndihmuar në gjetjen e një zgjidhjeje paqësore për konfliktin ukrainas", thuhet në deklaratë.
Udhëheqësit theksuan se partneriteti ruso-kinez mbetet një faktor kyç stabilizues në çështjet globale, duke theksuar se ai nuk është i drejtuar kundër asnjërës palë, shtohet në deklaratë.
Trump ka avancuar bisedimet me Rusinë për përmirësimin e marrëdhënieve dypalëshe dhe përfundimin e luftës në Ukrainë. Javën e kaluar, diplomatët amerikanë dhe rusë zhvilluan bisedime në Riad të Arabisë Saudite dhe po bëhen përgatitjet për një takim midis Trumpit dhe Putinit.
Kina e mirëpriti uljen e tensioneve mes ShBA-së dhe Rusisë.
"Kina është e kënaqur të shohë se Rusia dhe palët përkatëse kanë bërë përpjekje pozitive për të zgjidhur krizën," i tha Xi Putinit, sipas mediave shtetërore kineze.
Xi tha se historia dhe realiteti tregojnë se Kina dhe Rusia janë fqinjë të mirë që nuk mund të ndahen dhe miq të vërtetë që ndajnë pasurinë dhe fatkeqësinë, mbështesin njëra-tjetrën dhe arrijnë zhvillim të përbashkët.
Xi përsëriti se marrëdhëniet ruso-kineze janë të natyrës strategjike, nuk i nënshtrohen ndikimit të jashtëm dhe nuk drejtohen kundër askujt.
