Sekretari i Përgjithshëm i NATO-s, Jens Stoltenberg tha të mërkurën se aleatët e NATO-s kanë rënë dakord të forcojnë mbrojtjen ajrore të Ukrainës dhe të marrin përsipër koordinimin dhe ofrimin e shumicës së mbështetjes ndërkombëtare të sigurisë për këtë vend.
"Kjo nuk do ta bëjë NATO-n palë në konflikt, por do të ndihmojë Ukrainën të ruajë të drejtën e saj për vetëmbrojtje. Ne ramë dakord gjithashtu për ndihmën financiare për Ukrainën për të ndërtuar forca të afta për të mposhtur agresionin rus sot dhe për ta frenuar atë nesër. Ne ramë dakord që 40 miliardë euro është baza minimale për vitin e ardhshëm”, tha Stoltenberg në një konferencë për shtyp gjatë Samitit të NATO-s në Uashington.
Ai tha se NATO do të vazhdojë të mbështesë Ukrainën në rrugën e saj të pakthyeshme drejt anëtarësimit në aleancë. "Puna që po bëjmë së bashku tani do të sigurojë që Ukraina të mund të bashkohet pa vonesë, kur të jetë koha e duhur. Nuk është çështje nëse, por kur," tha Stoltenberg.
Ai shtoi se Kina është "iniciatorja vendimtare e luftës ilegale të Rusisë kundër Ukrainës dhe ofron pajisje me përdorim të dyfishtë".
"Unë mendoj se mesazhi i dërguar nga NATO, nga ky samit, është shumë i fortë dhe shumë i qartë, dhe ne e përcaktojmë qartë përgjegjësinë e Kinës kur bëhet fjalë për të mundësuar agresionin e luftës ruse kundër Ukrainës," theksoi Stoltenberg.
Sekretari i Përgjithshëm i NATO-s, Jens Stoltenberg ka thënë vazhdimisht se ai është i bindur se ShBA-ja do të vazhdojë të jetë një anëtare e përkushtuar e aleancës së NATO-s – pavarësisht se kush do të ulet në Shtëpinë e Bardhë vitin e ardhshëm, Joe Biden apo Donald Trump.
“NATO është aleanca më e suksesshme në histori, sepse ne arritëm të qëndronim jashtë debateve politike të brendshme”, tha Stoltenberg.
Në Uashington po mbahet dita e tretë e samitit treditor të NATO-s për 75 vjetorin e krijimit të aleancës ushtarake.
Temat kryesore përfshijnë ndihmën për Ukrainën, strategjitë e parandalimit dhe mbrojtjes dhe forcimin e partneriteteve.
