Filiali evropian i ambalazhimit të "Coca-Cola" njoftoi se ka urdhëruar një tërheqje masive të "Coca-Cola", "Sprite" dhe pijeve të tjera pasi janë zbuluar nivele të larta të kloratit, që përbën një rrezik potencial për shëndetin.
Coca-Cola bëri të ditur se kanaçe dhe shishe qelqi me përmbajtje të lartë të kësaj substance janë shpërndarë në Belgjikë, Holandë, Mbretërinë e Bashkuar, Gjermani, Francë dhe Luksemburg që nga nëntori, deklaroi "Coca-Cola Europacific Partners Belgium" për agjencinë France Press.
"Nuk kemi një shifër të saktë, por është e qartë se bëhet fjalë për një sasi të konsiderueshme," deklaroi kompania për pije të tërhequra.
Klorati mund të gjendet në ushqime pasi rrjedh nga dezinfektantët me klor, të cilët përdoren gjerësisht në trajtimin e ujit dhe përpunimin e ushqimeve.
Sipas një mendimi shkencor të vitit 2015 nga Autoriteti Evropian i Sigurisë Ushqimore, ekspozimi afatgjatë ndaj kloratit përbën një shqetësim të mundshëm shëndetësor për fëmijët, veçanërisht për ata me mungesë të lehtë ose të moderuar të jodit.
"Pjesa më e madhe e produkteve të prekura dhe të pashitura tashmë janë hequr nga raftet e dyqaneve dhe ne po vazhdojmë të marrim masa për të larguar të gjitha produktet e mbetura nga tregu," deklaroi "Coca-Cola Europacific Partners" në Belgjikë.
Ndërkohë, filiali francez i kompanisë deklaroi se analizat nga ekspertë të pavarur "përfunduan se gjasat për një rrezik të lidhur" janë "shumë të vogla".
"Nuk kemi marrë ankesa nga konsumatorët për këtë çështje," theksoi kompania.
Seritë e prekura të Coca-Cola dhe çajit Fuze janë dërguar në Francë, por urdhri për tërheqje nuk përfshinte tregun francez, u tha më tej.
