Tonelata me fruta të Afrikës së Jugut të bllokuar në portet evropiane

Miliona kuti me portokall janë prishur në kontejnerë të bllokuar në portet evropiane, përderisa Afrika e Jugut dhe Bashkimi Evropian kanë mosmarrëveshje mbi rregullat e importit.

Afrika e Jugut, eksportuesi i dytë më i madh në botë i agrumeve të freskëta pas Spanjës, paraqiti një ankesë në Organizatën Botërore të Tregtisë (OBT) muajin e kaluar pasi BE-ja prezantoi kërkesat e reja të sigurisë së bimëve dhe shëndetit që fermerët e portokalleve thonë se kërcënojnë mbijetesën e tyre.

Masat hynë në fuqi në korrik pasi anijet ishin tashmë në det duke transportuar qindra kontejnerë plot me fruta të Afrikës së Jugut në Evropë, duke rezultuar në ndalimin e tyre në momentin e arritjes, thonë nga Shoqata e Kultivuesve të Agrumeve të Afrikës së Jugut (CGA).

Rregullat e BE-së synojnë të trajtojnë përhapjen e mundshme të një insekti të quajtur mola e rreme, një dëmtues vendas në Afrikën sub-Sahariane që ushqehet me fruta duke përfshirë portokall dhe citroni.

Masat e reja kërkojnë që fermerët e Afrikës së Jugut të aplikojnë trajtim ekstrem të ftohtë për të gjitha portokallet e lidhura me Evropën dhe t'i mbajnë frutat në temperatura dy gradë Celsius (35 gradë Fahrenheit) ose më të ulëta për 25 ditë.

Por, CGA thotë se kjo masë është e panevojshme pasi vendi tashmë ka mënyrën e tij, më të synuar për të parandaluar infektimin.

Masa diskriminuese

Në ankesën e saj në OBT, Afrika e Jugut argumentoi se kërkesat e BE-së nuk ishin "të bazuara në shkencë", më shumë janë kufizuese sesa të nevojshme dhe "diskriminuese".

Kultivuesit e agrumeve të Afrikës së Jugut thonë se kërkesa ushtron presion shtesë të panevojshëm mbi një industri tashmë në gjendje të vështirë.

"Kjo do të shtojë shumë kosto... dhe për momentin, kjo është ajo që asnjë kultivues në botë nuk mund ta përballojë," tha Hannes de Waal, i cili drejton fermën pothuajse 100 vjeçare, Sundays River Citrus.

De Waal, kompania e të cilit ka pemë portokalli, klementinë dhe limoni që shtrihen në 7 mijë hektarë pranë qytetit bregdetar juglindor të Gqeberha, tha se të ardhurat tashmë ishin shtrydhur nga kostot e larta të transportit dhe plehrave.
Kostot e mallrave janë rritur që nga goditja e Covid-19, dhe po ashtu edhe çmimi i plehrave për shkak të konfliktit në Ukrainë – Rusia është një nga prodhuesit më të mëdhenj në botë.