Sekretari i Përgjithshëm i NATO-s, Mark Rutte, të hënën shprehu shqetësime serioze për situatën e sigurisë në Evropë, mes sfidave rajonale dhe globale që po vazhdojnë.
Gjatë një takimi të përbashkët të Komisioneve për Punët e Jashtme dhe Sigurinë dhe Mbrojtjen të Parlamentit Evropian, Rutte bëri thirrje për bashkëpunim më të ngushtë ndërmjet BE-së dhe NATO-s për të adresuar kërcënimet, duke përfshirë luftën gati trevjeçare në Ukrainë, përpjekjet destabilizuese nga Rusia dhe aleatët e saj, si dhe ndryshimet klimatike.
“Jam thellësisht i shqetësuar për situatën e sigurisë në Evropë. Nuk jemi në luftë, por as në paqe,” tha ai.
Rutte theksoi nevojën për ta rritur qëndrueshmërinë e shoqërive dhe infrastrukturës kritike, duke siguruar dhe zgjeruar mbështetjen për Ukrainën për të ndryshuar rrjedhën e luftës dhe për t’i penguar agresionet e mëtejshme.
Ai nënvizoi rëndësinë e një mbështetjeje të vazhdueshme për Ukrainën, duke thënë se kjo është thelbësore për të ushtruar presion mbi Rusinë që të angazhohet në negociata për një zgjidhje të qëndrueshme, e cila nuk e lë Ukrainën në disavantazh. Përforcimi i kapaciteteve të mbrojtjes dhe ushtarake të Evropës është gjithashtu i domosdoshëm, shtoi ai.
Rutte foli një javë para se Presidenti i Zgjedhur i ShBA-së, Donald Trump, ta marrë detyrën, duke premtuar pothuajse prerazi të shkurtojë ose eliminojë ndihmën e ShBA-së për Ukrainën.
Gjithashtu, Rutte, i cili mori detyrën në tetorin e kaluar, iu referua incidenteve të fundit në Detin Baltik, përfshirë dëmtimin e kabllove, për të cilat shumë vende perëndimore fajësojnë Rusinë.
“Duhet të jemi më të qëndrueshëm ndaj veprimeve të tilla armiqësore dhe ta bëjmë të qartë se përpjekjet për të krijuar destabilizim përmes sabotazhit dhe veprimeve të tjera nuk do të mbeten pa përgjigje,” tha ai.
