Nëse filloni të gogësini gjersa keni duart në timon, drejtohuni në sediljen tuaj dhe fokusohuni në trafik, sepse edhe mikrogjumi më i vogël mund të shkaktojë një aksident fatal. Çdo vit qindra njerëz humbasin jetën në trafik në këtë mënyrë.
Ç’nënkupton mikrogjumi në trafik?
Mikrogjumi është një periudhë shumë e shkurtër e gjumit që matet në sekonda, sipas ekspertëve.
Nëse vozitni 100 kilometra në orë dhe mbyllni sytë për vetëm dy sekonda, do të kaloni verbërisht 56 metra, thotë agjencia gjermane e inspektimit të sigurisë, TÜV.
Nëse sytë tuaj mbyllen dhe koka juaj ulet dhe më pas ju dridheni papritmas, kjo është shenjë se ndoshta keni qenë tashmë në një gjumë të vogël.
Është e rëndësishme t'u kushtoni vëmendje shenjave që ju dërgon trupi juaj për të shmangur këtë gjendje, e cila mund të jetë kërcënuese për jetën në rrugë.
Shenjat paralajmëruese janë gogësitë e shpeshta, fërkimi i syve, dridhjet e papritura ose lëkundjet e shpeshta në sedilje.
Ekspertët paralajmërojnë se këto janë shenjat e fundit pas të cilave duhet të ndaloni dhe të bëni një sy gjumë përpara se të vazhdoni të vozitni.
Rekomandimet dhe periudha kohore e rreziqeve në komunikacion
Rekomandohet të bëni një pushim prej 10 deri në 20 minuta.
Rreziku i mikrogjumit është më i lartë kur vozitni në një kohë që nuk është në përputhje me bioritmin e trupit tuaj.
Njerëzit janë biologjikisht më të lodhur midis dy dhe pesë të mëngjesit dhe rreth dy pasdite.
Megjithatë, kjo periudhë lodhjeje nuk është e njëjtë për të gjithë njerëzit, ndaj është e rëndësishme të njihni bioritmin tuaj dhe të mos vozitni kur ndiheni të lodhur. Disa njerëz ndihen më të lodhur në mbrëmje, dhe disa njerëzve u duhet më shumë kohë për t'u zgjuar në mëngjes.
Ata që zgjohen herët, të cilët ngrihen lehtësisht nga shtrati dhe ndihen të çlodhur dhe energjikë nga mëngjesi, zakonisht janë më të përgjumur pasdite dhe mbrëmje. Njerëzve të tillë rekomandohet të bëjnë një shëtitje pasdite për të marrë pak ajër të pastër përpara se të ngasin makinën.
Nga ana tjetër, ‘zogjtë e natës’ e kanë më të vështirë të zgjohen në mëngjes, por ndihen më energjikë pasdite. Nëse jeni në këtë grup, sigurohuni që të keni kohë të mjaftueshme për t'u zgjuar në mëngjes për të qenë më vigjilent dhe me mendje të kthjellët kur hipni pas timonit.
Edhe ata që udhëtojnë për në punë çdo ditë janë në rrezik të mikrogjumit.
Çdo mëngjes ata vozisin menjëherë pas zgjimit dhe përsëri në fund të ditës së punës. Niveli i përqendrimit dhe vigjilencës konsiderohet të jetë shumë i ulët kur njerëzit kthehen nga puna dhe është një nga periudhat më të këqija për të vozitur.
Stastistikat
Statistikat nga Gjermania tregojnë se shumica e aksidenteve të shkaktuara nga lodhja ndodhin midis gjashtë dhe tetë të mëngjesit dhe midis dy dhe katër pasdite.
Vlerësohet se rreth 600 njerëz vdesin në ShBA çdo vit sepse janë duke vozitur ndërsa janë të lodhur.
Pavarësisht nga koha e ditës, lodhja është një problem që duhet marrë seriozisht. Lodhja ul nivelin e përqendrimit, por edhe aftësinë për të reaguar shpejt.
Për më tepër, është e rëndësishme të mbani mend se shoferët në përgjithësi shpesh mbivlerësojnë aftësitë e tyre.
