Një raund i ri negociatash ndërmjet Kosovës dhe Serbisë filloi sot në Bruksel. Komisari i Lartë për Politikë të Jashtme dhe Siguri i Bashkimit Evropian Josep Borrell dhe Përfaqësuesi Special i BE-së për Dialog Miroslav Lajçak pritën në takime të ndara presidentin e Serbisë Aleksandar Vuçiq dhe më pas kryeministrin e Kosovës, Albin Kurtin.
Më pas vijon takimi tripalësh mes dy delegacioneve nga Kosova e Serbia dhe përfaqësuesve evropianë.
Në fund të takimit, kreu i diplomacisë evropiane Borrell do t'u drejtohet gazetarëve.
Fokusi i takimit do të jetë zbatimi i Marrëveshjes për rrugën drejt normalizimit, si dhe çështjet aktuale, njoftoi BE-ja.
Takimi i fundit është mbajtur më 22 qershor të këtij viti, për shkak të tensioneve në rritje në veri të Kosovës, me ftesë të zyrtarëve evropianë.
