Hakerë pro-iranian dyshohen për sulmin kibernetik në Shqipëri

Një sulm kibernetik mbylli përkohësisht shërbimet publike online dhe faqet qeveritare të Shqipërisë më 17 korrik. Agjencia Kombëtare e Shoqërisë së Informacionit bëri me dije se bëhej fjalë për një sulm kibernetik nga jashtë Shqipërisë.

Kompania amerikane “Mandiant” njoftoi se sulmi kibernetik mund të jetë vepër e hakerëve pro-iranianë që kishin për qëllim të prishnin konferencën e një grupi opozitar iranian në Shqipëri.

Ka qenë grupi “Homeland Justice” që mori përgjegjësinë e sulmit kibernetik që synonte prishjen e konferencës që do të mbahej më 23 dhe 24 korrik nga grupi opozitar iranian Muxhahedeen-e-Khalq, por që u anulua pas paralajmërimeve nga autoritetet lokale për një kërcënim të mundshëm terrorist. Takimi botëror i Iranit të Lirë do të mbahej në kamp dhe mes të ftuarve kishte edhe ligjvënës amerikanë.

“Kjo ngjarje përbën një kërcënim aktiv për organizatat publike dhe private në vendet e tjera anëtare të NATO-s. Ndërsa negociatat rreth marrëveshjes bërthamore të Iranit kanë ngecur, ajo tregon se Irani mund të jetë më pak i përmbajtur në kryerjen e sulmeve kibernetik në vazhdim”, tha kompania amerikane.

Kryeministri Rama ka bërë me dije pas sulmit kibernetik, se falë punës së një skuadre shqiptaro-amerikane, nuk u fshi asnjë e dhënë. Prej vitesh zonën e Manzës në periferi të Tiranës, në Shqipëri ekziston kampi "Ashraf” në të cilën qëndrojn rreth tre mijë pjesëtar të opozitës iraniane në emigrim.