Në raundin e katërt të votimit që u mbajt në Parlamentin grek, Konstantinos Tasoulas zgjidhet president i ri i Greqisë.
Parlamenti grek ka votuar për herë të katërt për të caktuar se kush do të zëvendësojë presidenten Katerina Sakellaropoulou, mandati i së cilës përfundon në mars.
Në votimin ku Konstantinos Tasoulas garoi si kandidat nga partia në pushtet Demokracia e Re, Tasos Giannitsis nga opozita kryesore Lëvizja Socialiste Panhelene (PASOK), Luka Katseli nga Aleanca e Majtë Radikale (SYRIZA) dhe Kostas Kyriakou si kandidatë nga Partia Fitores, morën pjesë 276 deputetë të Parlamentit prej 300 vendesh.
Në votim, Tasoulas doli i pari me 160 vota, Giannitsis mori 34, Katseli 29 dhe Kyriakou 14 vota. Ndërsa numri i abstenimeve ishte 39. Tasoulas kaloi 151 votat e nevojshme për raundin e katërt dhe fitoi të drejtën të bëhet president i ri i Greqisë.
Ai do ta marrë detyrën duke u betuar në Parlament më 13 mars, kur i mbaron mandati Sakellaropoulou-s. Në tri raundet e para të zgjedhjeve të mbajtura në Parlament asnjë kandidat nuk arriti të merrte numrin e duhur të votave, kështu që zgjedhjet kaluan në raundin e katërt.
Tasoulas përpara se të kandidonte për president është zgjedhur kryetar i Parlamentit tre herë, duke u bërë kryetar i parlamentit i zgjedhur me mbështetjen më të lartë parlamentare deri më sot. Ai u detyrua të jepte dorëheqje nga posti si kryetar i Parlamentit pasi u propozua si kandidat presidencial nga kryeministri grek, Kyriakos Mitsotakis.
Në Greqi presidenti zgjidhet me votim në Parlament
Në Greqi presidenti zgjidhet nga Parlamenti për një mandat 5-vjeçar. Një person mund të shërbejë si president për maksimum dy mandate në vend.
Në mënyrë që një kandidat të zgjidhet president, ai ose ajo duhet të marrë 200 vota, që është të paktën dy të tretat e numrit të përgjithshëm të deputetëve. Nëse kjo përqindje votash nuk arrihet, zgjedhjet përsëriten brenda 5 ditëve.
Nëse edhe në raundin e dytë të zgjedhjeve presidenciale nuk arrihet numri i mjaftueshëm prej 200 votash, Parlamenti shkon në votim për të tretën herë. Numri i kërkuar i votave në raundin e tretë të zgjedhjeve zbret në 180. Nëse edhe në raundin e tretë nuk arrihet numri i mjaftueshëm, president zgjidhet kandidati që merr 151 vota në raundin e katërt.
