Në ditën e dytë të mbledhjes së Komisionit për Evropën të Organizatës Botërore të Turizmit, “Konferenca e Investimeve në Turizëm dhe Zhvillimin Ekonomik të Europës dhe Shqipërisë” me fokus nxitjen e investimeve dhe rastin e historive të suksesit e perspektivat e së ardhmes në Shqipëri me pjesëmarrjen e zëvendëskryeministres Belinda Balluku, ministrit të Ekonomisë, të Kulturës dhe të Inovacionit Blendi Gonxhe, ministrit të Shtetit për Pushtetin Vendor Arbian Mazniku dhe minisitra e përfaqësues të industrisë së turizmit nga e gjithë Evropa.
Ministrja e Turizmit dhe e Mjedisit e Shqipërisë, Mirela Kumbaro, përshëndeti nisjen e kësaj konference dhe u shpreh se Shqipëria ka hyrë në epokën e investimeve në turizëm me qasjen e panegociueshme të zhvillimit të qëndrueshëm.
“Shqipëria ka hyrë në erën e industrisë së turizmit, por edhe për Europën që “Investimet në Turizëm dhe Zhvillimi Ekonomik në Europë” e qas sot përmes zhvillimit të qëndrueshëm dhe mbrojtjes së mjedisit si një kusht i panegociueshëm për të ardhmen”, u shpreh Kumbaro.
Më tej, ministrja Kumbaro u ndal te shifrat, të dhënat dhe lehtësitë fiskale që krijojnë një mjedis atraktiv për të investuar në Shqipëri.
“Kam parasysh publikimin më të fundit nga agjencia “Standard & Poors” e cila ka përmirësuar vlerësimin afatgjatë të kreditit sovran të Shqipërisë në “B+”, duke theksuar përmirësimin e pozicionit fiskal të vendit. Shqipëria sot po nis të korrë frytet e një pune të nisur vite më parë, me kuadrin ligjor që përgatitëm duke lehtësuar nga barrat fiskale investimet në turizëm, ku për të gjitha hotelet, nga ato më të voglat, nga bujtinat e agroturizmet e deri te strukturat më elitare, duke ulur TVSh-në në 6% nga 20% që është për bizneset e tjera; E meqë jemi në një konferencë investimesh, turizmi nuk është thjesht çështje e numrit të vizitorëve, por është mbi të gjitha një çështje të ardhurash dhe tashmë ky sektor është bërë industri, e këtë mund ta themi. Kjo matet edhe me të ardhurat që erdhën në ekonominë shqiptare”, tha Kumbaro.
“Plot 4,2 miliardë euro të ardhura nga ekonomia e turizmit në ekonominë shqiptare për vitin 2023 – 2,8 miliardë ishte kjo shifër për vitin 2022. Është para që ushqen gjithë zinxhirin e biznesit në vend”, u shpreh Kumbaro.
Në fund të fjalës së saj, Kumbaro falënderoi Organizatën Botërore të Turizmit, një produkt konkret nga ky bashkëpunim shumë i ngushtë me partnerët e UNWTO-s, duke krijuar për herë të parë një udhëzues për investimet në sektorin e turizmit në Shqipëri.
