Kuvendi i Shqipërisë ka miratuar ndryshimet në kabinetin qeveritar të Shqipërisë, në seancën e hapjes së sesionit të ri të legjislaturës së dhjetë, ndërkohë seanca nisi me tensione.
Seanca e cila zgjati rreth 13 minuta nisi me tensione pasi deputetët e opozitës nga Partia Demokratike e Shqipërisë dhe deputetë të tjerë opozitarë jashtë grupeve parlamentare bllokuan foltoren, duke mos lejuar që Presidenti i Shqipërisë, Bajram Begaj, të mbajë një fjalim me rastin e nisjes së sesionit të ri parlamentar.
Pas propozimeve të kryeministrit Edi Rama dhe pas dekreteve të Presidentit Begaj, ministri aktual i Financave dhe i Ekonomisë, Ervin Mete, është emëruar në detyrën e ministrit të Financave.
Kuvendi ka votuar dekretin që Blendi Gonxhja të emërohet ministër i Ekonomisë, i Kulturës dhe i Inovacionit, ministri e krijuar sipas propozimeve të fundit të kryeministrit Rama.
Gonxhja ka mbajtur më parë postin e Drejtorit të Përgjithshme të Shërbimeve të Transportit Rrugor të Shqipërisë (DPShTRr) dhe poste të tjera.
Rama ka propozuar edhe emërimin e një Ministri Shteti për Administratën Publike dhe Antikorrupsionin, duke propozuar në këtë post zv.ministren aktuale të Drejtësisë, Adea Pirdeni, ndërkohë edhe dekreti për emërimin e saj është miratuar në seancën e sotme.
Gjithashtu, Kuvendi ka votuar edhe dekretin për shkarkimin nga detyra të ministres së Kulturës, Elva Margariti.
Ndërkohë, pas ceremonisë së betimit ministrat e rinj do të marrin zyrtarisht detyrën.
Kujtojmë se seancat e Kuvendit të Shqipërisë në muajit e fundit të vitit të kaluar u përfshinë nga tensionet, pasi sipas deputetëve të opozitës nuk respektohen të drejtat e tyre dhe nuk miratohen në Kuvend nismat dhe kërkesat e tyre.
