Ministri i Mbrojtjes i Maqedonisë së Veriut, Vlado Misajlovski, sot ka qëndruar për vizitë zyrtare në Slloveni, ku është pritur me nderimet më të larta ushtarake nga homologu i tij Borut Sajoviq.
Siç njofton Ministria e Mbrojtjes e Maqedonisë së Veriut, Misajllovski ka pasur një takim kokë më kokë me Sajovicin, pas çka janë takuar edhe delegacionet dhe është nënshkruar Plani i Bashkëpunimit Bilateral ndërmjet dy vendeve për vitin 2025.
Misajllovski i ka quajtur marrëdhëniet në fushën e mbrojtjes midis dy vendeve “një shembull se si duhet të bashkëpunojnë dy vende jashtëzakonisht miqësore dhe aleate”, duke vënë në dukje se ato bazohen “ekskluzivisht në respektin reciprok dhe besimin e fortë”.
“Ne bashkëpunojmë në shumë fusha të mbrojtjes - mbrojtjen ajrore, logjistikën dhe prokurimin publik, inteligjencën ushtarake, inspektimin, procesin e planifikimit brenda NATO-s dhe shumë të tjera. Ushtarët tanë jo vetëm që ushtrojnë dhe stërviten së bashku, ata gjithashtu mbajnë së bashku barrën e mbrojtjes kolektive të Aleancës, duke shërbyer në forcën shumëkombëshe të NATO-s në Letoni. Kjo tregon unitetin tonë”, ka thënë tha Misajllovski në një konferencë të përbashkët për shtyp me ministrin Sajoviq.
Ministri slloven Sajoviq e ka quajtur bashkëpunimin në mbrojtje “shumë të mirë” dhe ka shprehur mbështetje të fuqishme për anëtarësimin e Maqedonisë së Veriut në Bashkimin Evropian, duke theksuar se anëtarësimi në bllokun evropian është i mirë edhe për jetën, edhe për sigurinë në rajon.
Ndërkaq, Misajllovski është pritur në një takim edhe nga presidentja sllovene Natasha Pirc Musar, e cila në një postim në rrjetet sociale pas takimit, ka thënë se ndihma që Sllovenia i kishte ofruar Maqedonisë së Veriut në shuarjen e zjarreve dhe mbështetja për Slloveninë gjatë përmbytjeve “dëshmojnë për miqësinë e ngushtë midis dy vendeve”.
