Presidentja e Maqedonisë së Veriut, Gordana Siljanovska-Davkova, ka pritur në takim në pallatin presidencial nënkryetarin e Agjencisë Turke për Koordinim dhe Zhvillim (TIKA), Mahmut Çevik.
Në një njoftim nga kabineti i presidentes, në takim u bisedua për punën e TIKA-s në Maqedoninë e Veriut, ku presidentja Siljanovska-Davkova ka shprehur falënderime për “mbështetjen afatgjate”, projektet e realizuara, si dhe për kontributin personal të z. Çevik në këtë drejtim.
“Türkiye ka qenë miku dhe aleati ynë besnik që nga ditët e para të pavarësisë, e cila na mbështet në të gjitha fushat”, vlerësoi Siljanovska-Davkova, duke theksuar se mes dy vendeve ekzistojnë marrëdhënie të shkëlqyera bilaterale që shtrihen në të gjitha fushat.
Ndër projektet e rëndësishme të realizuara nga TIKA, presidentja theksoi rinovimin e disa shkollave në vend, realizimin e programeve trajnuese për personelin mjekësor, pajisjen e disa klinikave dhe spitaleve me pajisje moderne mjekësore, si dhe realizimin e projekteve që synojnë rritjen e pjesëmarrjes së grave dhe fëmijëve në jetën sociale.
Siljanovska-Davkova theksoi rëndësinë e projekteve për aplikimin e teknikave moderne bujqësore dhe ndërmarrjen e aktiviteteve ekonomike në zonat rurale, si dhe aktivitetet e TIKA-s në fushën e dialogut social dhe bashkëpunimit, organizimin e ngjarjeve kulturore për nxitjen e dialogut ndërmjet grupeve etnike dhe të tjera.
Këto aktivitete, theksohet në njoftimin e kabinetit të presidentes, sipas Siljanovska-Davkovës janë dëshmi konkrete e marrëdhënieve miqësore mes dy vendeve.
Në takim gjithashtu u bisedua për planet e ardhshme të TIKA-s për realizimin e disa projekteve në vend. Në këtë kontekst, ajo theksoi përkushtimin e saj për forcimin e mëtejshëm të marrëdhënieve bilaterale ndërmjet dy vendeve.
