Kryeministra dhe presidentë të shteteve të rajonit kanë uruar Donald Trumpin për fitoren e arritur në zgjedhjet e 47-ta presidenciale në ShBA. Kreu i Qeverisë së Shqipërisë, Edi Rama, e ka cilësuar të jashtëzakonshme fitoren e Trumpin në garën për president.
“Ishte një nder i vërtetë të punoja së bashku me Presidentin e 46-të të Shteteve të Bashkuara për të forcuar lidhjen midis dy vendeve tona. Mezi pres privilegjin e madh të punoj me Presidentin e 47-të për të përmirësuar më tej partneritetin tonë për paqe, prosperitet dhe përparim të mëtejshëm”, shkruan Rama në X.
Urime drejt Donald Trumpit ka dërguar edhe presidentja e Kosovës, Vjosa Osmani, e cila thekson se ShBA-ja mbetet partneri i palëkundur dhe aleati i domosdoshëm i Kosovës.
“Mezi pres të punoj me administratën e re për të thelluar më tej lidhjen tonë unike dhe aleancën strategjike. Zoti e bekoftë Amerikën, liderin e botës së lirë”, shprehet presidentja Osmani. Mes të tjerash, ajo e ka uruar edhe JD Vance për caktimin në pozitën e Zëvendëspresidentit të ShBA-së.
Kryeministri i Maqedonisë së Veriut, Hristijan Mickoski, në urimin e tij shkruan se fitorja e Donald Trumpit është vërtetim për besimin e thellë të popullit amerikan në parimet e lirisë dhe demokracisë.
“Me padurim shpresojmë që të thellojmë më tej partneritetin dhe bashkëpunimin tonë të fortë, veçanërisht në fushat e sigurisë, zhvillimit ekonomik dhe reformës demokratike. Maqedonia mbetet e përkushtuar për ndërtimin e lidhjeve edhe më të forta me ShBA-në, si aleat dhe mik strategjik, i cili do të vazhdojë të forcojë stabilitetin dhe përparimin e të gjithë rajonit. Urime dhe urimet më të mira për Presidentin Trump dhe gjithë popullin amerikan!”, shkruan kryeministri i Maqedonisë së Veriut.
Edhe president i Serbisë, Aleksandar Vuçiq, e ka uruar Donald Trumpin për fitoren e arritur në zgjedhjet presidenciale në ShBA, duke theksuar se “së bashku ballafaqohemi me sfida serioze të cilat janë para nesh. Serbia është e përkushtuar në bashkëpunimin me ShBA-në për stabilitet, prosperitet dhe paqe”.
