Udhëheqësit e gjashtë vendeve të Ballkanit Perëndimor do të takohen sot me homologët e tyre të Bashkimit Evropian në Bruksel për të vlerësuar marrëdhëniet e tyre të ngushta, por të ndërlikuara.
“Takimi i samitit është një mundësi për të riafirmuar perspektivën e anëtarësimit të Ballkanit Perëndimor në BE, si dhe nevojën për progres të qëndrueshëm dhe të pakthyeshëm nga partnerët në drejtim të reformave, bazuar në vlerat dhe parimet e BE-së”, thotë Këshilli Evropian.
Temat në agjendë përfshijnë perspektivat e anëtarësimit në BE, sanksionet e bllokut ndaj Rusisë dhe bashkëpunimin ekonomik.
Shqipëria, Bosnjë e Hercegovina, Kosova, Mali i Zi, Maqedonia e Veriut dhe Serbia kanë ambicie për t’u anëtarësuar në BE, por përballen me procedura të gjata dhe të përpikta të anëtarësimit.
Mali i Zi, i konsideruar si kryesuesi, filloi bisedimet në vitin 2012, i ndjekur nga Serbia në 2014.
Megjithatë, të dyja vendet janë larg nga përafrimi i plotë i ligjeve dhe standardeve të tyre me normat e BE-së.
Shqipëria dhe Maqedonia e Veriut hapën bisedimet e pranimit vitin e kaluar, më shumë se një dekadë pasi kishin aplikuar për anëtarësim.
Bosnja mund të shpresojë të arrijë më vonë këtë javë, kur liderët e BE-së mund të vendosin në një samit të veçantë për të hapur bisedimet e pranimit me vendin – së bashku me Ukrainën dhe Moldavinë.
Afrimi i Kosovës pengohet nga fakti se disa vende të BE-së nuk e kanë njohur pavarësinë e saj pas shkëputjes së Kosovës nga Serbia në vitin 2008.
Udhëheqësit e BE-së pritet gjithashtu të rrisin sanksionet e bllokut ndaj Rusisë për luftën e saj kundër Ukrainës, pasi Serbia nuk ka miratuar ende masa ndëshkuese kundër Moskës.
Tensionet e rritura midis Serbisë dhe Kosovës do të diskutohen gjithashtu nga liderët, si dhe migrimi i parregullt përmes rajonit drejt BE-së.
Krahas marrëdhënieve politike, liderët do të diskutojnë gjithashtu lidhjet ekonomike dhe investimet në infrastrukturë, si rrugët, hekurudhat, interneti dhe rrjetet elektrike.
Një fond i propozuar me vlerë deri në 6 miliardë euro megjithatë është përfshirë në një debat të brendshëm të BE-së mbi rishikimin e buxhetit të përbashkët të bllokut.
