Vendet e rajonit kanë shënuar një rritje enorme të numrit të turistëve gjatë gjashtëmujorit të parë të vitit 2023.
Duke vlerësuar të dhënat e Enteve Shtetërore për statistika vërehet një fluks i lartë i turistëve për dallim nga një vit më parë.
Numri i përgjithshëm i turistëve gjatë kësaj periudhe në 6 vendet e rajonit është 11 milionë e 164 mijë e 428.
Nga statistikat e mëposhtme të cilat do ua sjell TRT Balkan konstatohet që Shqipërinë e kanë vizituar dyfish më shumë turistë sesa të gjitha shtetet e rajonit bashkë.
Shqipëria me shifra rekorde
Sipas INSTAT-it, hyrjet e shtetasve të huaj për 8 muajt e parë të këtij viti në Shqipëri arritën në gati 7,2 milionë persona (7.190.410), me një rritje prej 26,9% në krahasim me të njëjtën periudhë të një viti më parë.
Vetëm në gusht, që është kulmi i sezonit turistik, në Shqipëri hynë rreth 2 milionë shtetas të huaj, ose 18,3% më shumë se sa gushti i një viti më parë.
Që nga qershori në Shqipëri hynë mbi 1 milion shtetas të huaj, për të arritur në 1,77 milionë në korrik, duke e kaluar për herë të parë pragun e 2 milionëve në gusht.
Shtetasit nga Kosova vijojnë të zënë pjesën më të madhe të hyrjeve në Shqipëri, me rreth një të tretën. Këtë vit, për herë të parë italianët kaluan të dytët me rreth 10%, të ndjekur nga vendet e tjera të rajonit, Mali i Zi dhe Maqedonia e Veriut.
Serbia e dyta
Në gjysmën e parë të vitit 2023 në Serbi ka pasur 1.849.829 turistë, që është 13,9 për qind më shumë se vitin e kaluar në të njëjtën periudhë.
Turistë vendas kanë qenë 956.467 ose 2,1 për qind më shumë krahasuar me të njëjtën periudhë të vitit të kaluar dhe 893.362 turistë të huaj, që është një rritje prej 30 për qind.
Numri i përgjithshëm i qëndrimeve të turistëve është 5.518.552, që është 10,5 për qind më shumë se vitin e kaluar.
Mali i Zi dhe BeH-ja pothuajse njëjtë
Gjashtëmujori i parë i vitit 2023 sa i përket turizmit në Mal të Zi dhe BeH, sipas autoriteteve shtetërore për statistika, është pothuajse i ngjashëm.
Në Mal të Zi kishim 752.391 turistë, ose 53 për qind më shumë se në gjashtëmujorin e parë të vitit 2022.
Ndërsa në Bosnjë e Hercegovinë për gjashtëmujorin e parë janë futur gjithsej 731.371 turistë, ose 23 për qind më shumë se në të njëjtën periudhë të vitit 2022.
Maqedonia e Veriut me rritje prej 30 për qind
Maqedonia e Veriut për dallim nga gjashtëmujori i parë i vitit 2022 ka shënuar një rritje të konsiderueshme të numrit të turistëve.
Sipas të dhënave të Entit Shtetëror për Statistikë në Maqedoninë e Veriut gjatë gjashtëmujorit të parë të këtij viti janë regjistruar 413.077 turistë, ose një rritje prej 30,01 për qind.
Kosova më zbehtë
Sa i përket Kosovës, në mungesë të të dhënave nga Enti Shtetëror për Statistikë, nuk kemi një pasqyrë të qartë për 6-mujorin e parë, meqenëse mungojnë muaji prill dhe maj. Kështu, duke përfshirë të dhënat e janarit, shkurtit, marsit, qershorit dhe korrikut, brenda këtyre pesë muajve gjithsej janë regjistruar 227.350 turistë që e kanë vizituar Kosovën.
