Gjykata e Posaçme e Shkallës së Parë për Korrupsionin dhe Krimin e Organizuar e Shqipërisë (GJKKO) do të vendosë sot në lidhje me arrestimin e kryetarit të Bashkisë së Tiranës, Erion Veliaj.
Seanca që nisi rreth orës 09:00 është ndërperë dhe shtyrë me disa orë, pasi mësohet se avokatët e Veliajt kanë kërkuar të njihen me dosjen.
Veliaj është i dyshuar për korrupsion dhe pastrim parash dhe ndodhet në paraburgim, ndërsa ndaj bashkëshortes së tij, Ajola Xoxa, është vendosur masa "arrest në shtëpi", masa të cilat do vlerësohen në seancën e sotme.
Nga ana tjetër, gjatë mbërritjes së Veliajt dhe bashkëshortes së tij në gjykatë, dhjetëra mbështetës të kryebashkiakut të Tiranës u mblodhën para ambienteve të GjKKO-së, në shenjë solidariteti ndaj tij.
Mbështetësit mbanin në duar pankarta me foto të institucioneve arsimore dhe objekteve të tjera të ndërtuara në Tiranë gjatë mandateve të Veliajt.
Arrestimi i kryebashkiakut Veliaj
Kryetari i Bashkisë së Tiranës, Erion Veliaj, është arrestuar më 10 shkurt, i dyshuar për korrupsion dhe pastrim parash, ndërsa ndaj bashkëshortes së tij, Ajola Xoxa, është vendosur masa e sigurisë "arrest në shtëpi", e dyshuar për disa vepra penale.
Në kudër të këtij hetimi, ndaj një biznesmeni është vendosur masa "arrest me burg" dhe ndaj disa biznesmenëve të tjerë është vendosur masa "detyrim për t’u paraqitur në policinë gjyqësore".
Kujtojmë se në Shqipëri janë organizuar për muaj me radhë protesta për t'i "denoncuar rastet e korrupsionit në Bashkinë e Tiranës" dhe me kërkesën për dorëheqjen e kryebashkiakut Veliaj.
Veliaj është kryetar i Bashkisë së Tiranës që prej vitit 2015, ndërkohë ka mbajtur post edhe në Qeverinë e Shqipërisë, si dhe ka qenë edhe deputet.
