Sevdalinka, kënga e qytetetare dhe popullore e Bosnjë e Hercegovinës, është përfshirë në Listën Përfaqësuese të UNESCO-s të Trashëgimisë Kulturore Jomateriale të Njerëzimit.
Me këtë rast, ministria Federale e Kulturës dhe Sportit e BeH-së mbajti të mërkurën një konferencë për media, ku u theksua se procesi i regjistrimit të sevdalinkës në Listën Përfaqësuese të UNESCO-s zgjati disa vjet, por që falë punës jashtëzakonisht të përkushtuar, pavarësisht vështirësive të shumta, procesi përfundoi.
“Sot është momenti solemn që Ministria Federale, e cila është dhe ka qenë kandidate për Sevdalinkën, ka rastin të thotë se procesi ka përfunduar, jam e sigurt për gëzimin e madh të të gjithë banorëve, jo vetëm të Federatës së Bosnjës e Hercegovinës, por të gjithë Bosnjës e Hercegovinës”, tha ministrja e kulturës dhe e sportit të BeH-së, Sanja Vlaisavljeviq.
Ndihmës ministrja Mirela Miliçeviq Sheçiq, e cila ka punuar me ekipin e saj në procesin e regjistrimit të sevdalinkës në Listën Përfaqësuese të UNESCO-s, tha se me këtë akt, sevdalinka bëhet "pjesë e mozaikut kulturor të botës, një përfaqësuese e denjë e kulturës së popujve tanë, pasurisë dhe trashëgimisë jomateriale të vendit tonë”.
