Në Shqipëri është hapur panairi i punës dhe aftësive, ku do të prezantohen ofertat e ndryshme të punësimit nga kompanitë dhe programet e studimit nga institucionet arsimore private e publike.
Panairi organizohet në Pallatin e Kongreseve në Tiranë me moton “Punë dhe studim”, ndërsa pjesë e tij janë dhjetëra kompani dhe institucione arsimore.
Pjesë e panairit është edhe universiteti i Fondacionit Turk Maarif, Universiteti i New Yorkut në Tiranë, i cili do të prezantojë programet e studimit dhe risitë që ofron ky universitet.
Kryetari i Dhomës së Tregtisë dhe Industrisë Tiranë, Nikolin Jaka, në një deklaratë për mediat në lidhje me hapjen e panairit tha se sipërmarrja private është para sfidave të mëdha, sipas tij, në radhë të parë është sfida e integrimit, përshtatja e konkurrencës dhe tregut për tregun e madh të Bashkimit Evropian dhe nga ana tjetër sfida e kapitalit njerëzor.
Ai theksoi se nëse sipërmarrja duhet të integrohet në nivelin e duhur dhe të arrijë standardet e Bashkimit Evropian, duhet të ketë një kapital njerëzor të kualifikuar dhe të diplomuar në mënyrën e duhur.
“Ky panair që organizohet sot është një sinjal i pastër që u jepet në radhë të parë të gjithë të rinjve shqiptarë, që po vetëm nëpërmjet edukimit dhe aftësimit profesional ne mund të jemi vlerë e shtuar për veten, ekonominë dhe familjen tonë dhe nga ana tjetër është një sinjal i pastër për sipërmarrjen private që kapitali njerëzor i kualifikuar duhet të paguhet në mënyrën dinjitoze", tha Jaka.
Panairi që mbahet në datat 25-26 prill, organizohet nën kujdesin e Dhomës së Tregtisë dhe të Industrisë Tiranë, me mbështetjen e Ministrisë së Financave dhe të Ekonomisë së Shqipërisë, Ministrinë së Arsimit dhe të Sportit, Agjencisë Kombëtare të Punësimit dhe të Aftësive të Shqipërisë dhe Bashkisë së Tiranës.
