Policia e Shqipërisë njoftoi sot se ka ndihmuar 2 turistë gjermanë që ishin bllokuar në zonën e Krrabës, te “Syri i Ciklopit”.
Sipas njoftimit të Policisë së Tiranës, bëhet me dije se operacioni i kërkim-shpëtimit ka zgjatur 5-orë, gjatë të cilave u bë e mundur që turistet nga Gjermania të shpëtohenin.
“Mbrëmjen e djeshme, pas njoftimit se 2 turiste gjermane kishin mbetur të bllokuara në vendin e quajtur “Syri i Ciklopit”, për shkak të terrenit të vështirë malor dhe mungesës së orientimit në errësirë, është organizuar menjëherë puna për gjetjen e tyre. Shërbimet e Komisariatit të Policisë Nr. 1 dhe grupi alpin i Forcës Kombëtare të Sigurisë, në bashkëpunim me Federatën Shqiptare të Alpinizmit, pas gati 5 orësh kërkime, deri pas mesnatës, kanë bërë të mundur gjetjen dhe shpëtimin e 2 turisteve gjermane, 28 vjeçe dhe 31 vjeçe, të cilat janë në gjendje të mirë shëndetësore”, bën të ditur Policia e Tiranës.
Policia e Tiranës njoftoi se është e angazhuar maksimalisht për garantimin e sigurisë së turistëve dhe vizitorëve.
