Zjarri pushton malet e Shqipërisë, 368 zjarrfikës në terren

Qendra Kombëtare Operacionale e Emergjencave Civile të Shqipërisë gjatë 24 orëve të fundit ka raportuar 15 vatra zjarri, me ç’rast në terren janë angazhuar 26 automjete zjarrfikëse dhe 368 zjarrfikës efektiv.
Zëvendësministrja e Mbrojtjes, Dallëndyshe Bici informoi sot mbi situatën e zjarreve në vend.
“Pas një pune të pandërprerë të forcave operacionale u bë i mundur izolimi i plotë i vatrave në: fshatin Tomorricë, bashkia Skrapar, fshatin Qukës Skënderbej, bashkia Prrenjas, fshatin Shetël, bashkia Shijak, fshatin Karbunarë e Sipërme dhe fshati Balaj bashkia Lushnjë, fshatin Lalaj, bashkia Fier, fshatin Peshkëpi, bashkia Selenicë, Uji i Ftohtë, bashkia Vlorë, fshatin Qafë Mali, bashkia Fushë Arrëz, Mali i Jushit, bashkia Vau Dejës, fshatin Grudë e Re, bashkia Shkodër, fshatin Qarr, bashkia Has, lagjen Nr.3, bashkia Kavajë”, tha Bici.
Sipas saj në aksionet për shuarjen e flakëve gjatë 24 orëve të fundit janë angazhuar 368 efektivë zjarrfikës, Forca të Armatosura, forca bashkiake, forca policore, punonjës të Administratës së Zonave të Mbrojtura, shërbimi pyjor, forca vullnetare, 26 mjete zjarrfikëse dhe një helikopter. Helikopteri ka operuar në fshatin Ndërshen, Bashkia Mirditë dhe në fshatin Shetël, bashkia Shijak.
“Aktualisht janë aktive vatrat në fshatin Ndërshen, bashkia Mirditë, fshatin Vinjollë, bashkia Kurbin”, u shpreh Bici.
Bici përsëriti thirrjen për të gjithë qytetarët që të jenë të kujdesshëm në çdo veprim që mund të shkaktojë zjarr.
“Mosraportimi në kohë i vatrave sado të vogla nxit përhapjen e tyre në sipërfaqe më të mëdha, ndaj bashkëpunoni me pushtetin vendor dhe shërbimin zjarrfikës!”, theksoi Bici.