Përfaqësuesi i Lartë i Bashkimit Evropian (BE) për politikën e jashtme dhe sigurinë, Josep Borrell, tha të enjten se ishte i tmerruar nga lajmi për sulmin izraelit ndaj masës së njerëzve që prisnin ndihmën humanitare në Gaza.
“Jam i tmerruar nga lajmi për një tjetër masakër të civilëve në Gaza, të cilët të dëshpëruar kërkojnë ndihmë humanitare”, shkruan Borrell në rrjetin social X, duke shtuar se ishte krejtësisht i papranueshëm.
Duke deklaruar se mohimi i ndihmave ushqimore për njerëzit është një shkelje serioze e ligjit ndërkombëtar humanitar, ai tha se "qasja e papenguar humanitare në Gaza duhet të lejohet".
Ministria e shëndetësisë me bazë në Gaza tha se të paktën 112 njerëz u vranë dhe 760 u plagosën të enjten në mëngjes kur forcat izraelite nisën një sulm ndaj palestinezëve që prisnin ndihmë humanitare në jug të qytetit të Gazës.
Izraeli nisi një ofensivë vdekjeprurëse në Rripin e Gazës pasi Hamasi sulmoi Izraelin më 7 tetor, duke vrarë më shumë se 30.000 njerëz dhe duke shkaktuar shkatërrim të gjerë dhe mungesë furnizimesh në enklavën e bllokuar palestineze.
Më 26 janar, pas një padie për gjenocid të ngritur nga Republika e Afrikës së Jugut, Gjykata Ndërkombëtare e Drejtësisë vendosi që Izraeli duhet të përmbahet nga çdo veprim në lidhje me vrasjen, sulmet dhe shkatërrimin e banorëve të Rripit të Gazës dhe të marrë të gjitha masat për të parandaluar gjenocid.
