Të paktën pesë persona të hënën në mëngjes u raportuan të vrarë në një seri sulmesh ajrore izraelite në gjithë Rripin e Gazës, të shkatërruar nga lufta.
Agjencia zyrtare palestineze e lajmeve Wafa tha se një dron izraelit goditi një grup njerëzish në zonën Beit Lahia, në veri të Gazës, duke lënë një person të vrarë dhe disa të tjerë të plagosur.
Po ashtu, agjencia tha se një tjetër dron goditi një grup njerëzish në lagjen Shejaiya, në qytetin lindor të Gazës, duke rezultuar në vdekjen e tre personave dhe plagosjen e tre të tjerëve.
Wafa shtoi se artileria e ushtrisë izraelite goditi në afërsi të një klinike në lagjen Zeitoun, gjithashtu në qytetin lindor të Gazës, por nuk raportohet për viktima. Në Rripin qendror të Gazës, të paktën një palestinez u vra dhe të tjerë u plagosën të hënën në agim, ndërsa ushtria izraelite goditi një shtëpi në kampin e refugjatëve Nuseirat.
Një fëmijë u plagos nga plumbat e një droni izraelit në kampin lindor të refugjatëve Al-Maghazi. Në pjesën më jugore të Rripit të Gazës, ushtria izraelite vazhdoi të sulmonte dhe të bombardonte zonat në Rafah, duke hedhur në erë edhe më shumë ndërtesa në zonat veriperëndimore të qytetit.
Ushtria izraelite ka vazhduar një ofensivë shkatërruese në Rripin e Gazës që nga një inkursion ndërkufitar nga grupi palestinez Hamas tetorin e kaluar, pavarësisht një rezolute të Këshillit të Sigurimit të OKB-së që kërkon një armëpushim të menjëhershëm.
Afro 43.000 njerëz janë vrarë që atëherë, kryesisht gra dhe fëmijë, ndërsa mbi 100.800 të tjerë janë plagosur, sipas autoriteteve lokale shëndetësore. Sulmi izraelit ka zhvendosur pothuajse të gjithë popullsinë e territorit mes një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Izraeli gjithashtu përballet me një padi gjenocidi në Gjykatën Ndërkombëtare të Drejtësisë për veprimet e tij në Gaza.
