Të paktën tetë palestinezë u vranë të mërkurën dhe disa të tjerë u plagosën në një sulm ajror izraelit në qytetin Rafah, në Rripin jugor të Gazës.
"Tetë anëtarë të familjes Ayad, të zhvendosur nga qyteti i Gazës, duke përfshirë pesë fëmijë dhe dy gra, u vranë nga bombardimi i një dhome në një tokë bujqësore në vendbanimin Salam, në jug të Rafahut", thanë burimet mjekësore për Anadolu.
Në sulmin në shtëpinë e familjes Bahabsa u plagosën edhe disa palestinezë, raporton korrespondenti nga Anadolu Agency.
Këto sulme ndodhin mes shqetësimeve rajonale dhe ndërkombëtare për planet izraelite për të sulmuar Rafahun, ku rreth 1,4 milion palestinezë të zhvendosur janë larguar nga pjesë të tjera të Rripit të Gazës.
Izraeli i akuzuar për gjenocid ka nisur një ofensivë në Rripin e Gazës që nga një sulm ndërkufitar nga grupi palestinez Hamas më 7 tetor që vrau rreth 1.200 njerëz.
Numri i personave të vrarë në sulmet e kryera nga ushtria izraelite në Rripin e Gazës që nga 7 tetori 2023 është rritur në 33.899.
Lufta e Izraelit ka shtyrë 85 për qind të popullsisë së Rripit të Gazës në zhvendosje të brendshme me mungesë akute të ushqimit, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar, sipas të dhënave të Kombeve të Bashkuara.
Izraeli akuzohet për gjenocid para Gjykatës Ndërkombëtare të Drejtësisë. Një vendim i përkohshëm në janar urdhëroi Tel Avivin të ndalojë aktet gjenocidale dhe të marrë masa për të siguruar që ndihma humanitare të ofrohet për civilët në Gaza.
