Rreth një në gjashtë të rritur globalisht kanë përjetuar infertilitet të paktën një herë në jetën e tyre, thuhet në një raport nga Organizata Botërore e Shëndetësisë, duke u kërkuar vendeve që të mbledhin në mënyrë aktive të dhëna më të qëndrueshme për sëmundjen.
Raporti i së hënës analizoi studimet ekzistuese të kryera nga viti 1990 deri në vitin 2021 dhe tregoi se rreth 17,5% e të rriturve në gjithë botën ishin të prekur nga pamundësia për të pasur një fëmijë.
Zyrtarët e OBSh-së thanë se raporti merr parasysh disa qasje hulumtuese.
“Përqindja e madhe e njerëzve të prekur tregon nevojën për të zgjeruar qasjen në kujdesin e fertilitetit dhe për të siguruar që kjo çështje të mos anashkalohet më në kërkimet dhe politikat shëndetësore”, tha shefi i agjencisë shëndetësore të OKB-së, Tedros Adhanom Ghebreyesus.
OBSh-ja e përkufizon infertilitetin si një sëmundje të sistemit riprodhues të mashkullit ose femrës që përkufizohet nga dështimi për të arritur një shtatzëni pas 12 muajsh ose më shumë të marrëdhënieve të rregullta seksuale të pambrojtura.
Nuk kishte asnjë provë të rritjes së shkallës së infertilitetit midis 1990 dhe 2021, u tha gazetarëve në një telefonatë kreu i njësisë së agjencisë globale të shëndetit për Kontracepsionin dhe Kujdesin e Fertilitetit, James Kiarie.
"Bazuar në të dhënat që kemi, nuk mund të themi se infertiliteti është në rritje ose konstante”, tha ai, duke përmendur se të dhënat e deritanishme kanë qenë të përziera dhe jokonsistente.
Raporti thekson nevojën që vendet të mbledhin dhe të ndajnë të dhëna të qëndrueshme mbi infertilitetin, të ndara sipas moshës dhe shkakut, si dhe informacion për ata që kanë nevojë për kujdes të fertilitetit.
Rreth 17,8% e të rriturve në vendet me të ardhura të larta kanë përjetuar infertilitet të paktën një herë dhe rreth 16,5 për qind e të rriturve në vendet me të ardhura të ulëta dhe të mesme, sipas raportit.
