Këshilli Kombëtar i Integrimit Evropian të Shqipërisë (KKIE) ka organizuar takimin me temë “Ecuria e reformave në kuadër të Procesit të Berlinit”, ndërkohë të pranishëm ishin përfaqësues të institucioneve të ndryshme.
Ministri i Brendshëm i Shqipërisë, Taulant Balla, në fjalën e tij u fokusua në angazhimin e ministrisë që ai drejton mbi ecurinë e reformave në vend, flukset migratore, luftën kundër kultivimit të lëndëve narkotike dhe çështje të tjera.
Balla theksoi se bashkëpunimi rajonal me mbështetjen e Bashkimit Evropian ka vijuar të forcohet në linjë me angazhimet e Procesit të Berlinit.
"Sa i përket përballjes me flukset migratore dhe angazhimit të Qeverisë shqiptare dhe të agjencive ligjzbatuese shqiptare, Bashkimi Evropian vlerëson Shqipërinë si një vend model sa i përket qasjes që ka pasur në përballimin e flukseve migratore", tha Balla.
Balla u shpreh se sa i përket Ministrisë së Brendshme, mbetet objektiv strategjik goditja e të gjitha formave të veprimtarive kriminale. Sipas tij, gjatë vitit të fundit Policia e Shqipërisë ka ndërmarrë 1.251 operacione kombëtare.
"Po përdorim dronët Bayraktar për të monitoruar të gjithë territorin, me fokus luftën kundër veprimtarive të paligjshme në fushën e kultivimit të lëndëve narkotike, por edhe në fusha të tjera, përfshirë krimet mjedisore", tha Balla.
Ai shtoi se për të mbetet objektiv kryesor jo administrimi i ngjarjeve kriminale, por parandalimi i ngjarjeve kriminale.
Kujtojmë se Procesi i Berlinit është një iniciativë që synon rritjen e bashkëpunimit rajonal në Ballkanin Perëndimor dhe dhënien e ndihmës për integrimin e vendeve të rajonit në Bashkimin Evropian.
KKIE-ja është struktura më e lartë këshillimore kombëtare në Shqipëri për integrimin evropian, që nxit dhe garanton bashkëpunimin gjithëpërfshirës ndërmjet forcave politike, institucioneve publike dhe shoqërisë civile.
