Për shkak të protestave të prodhuesve lokalë, Qeveria e Bullgarisë ka pezulluar importin nga Ukraina të 20 lloj drithërave, kryesisht të grurit.
Kryeministri Galab Donev, në një deklaratë për media, tha se Bullgaria është në solidaritet me Ukrainën, por se ka pezulluar në mënyrë të përkohshme importin e disa produkteve për shkak se prodhuesit vendas nuk e shohin të drejtë konkurrencën që krijon ky import i lirë.
Ai tha se nuk do të pengohen kalimet tranzit. "Shpresoj që organet përkatëse të Bashkimit Evropian të shikojnë se ‘korridoret e solidaritetit‘ të krijuara (me Ukrainën) nuk japin rezultatin e pritshëm dhe të vendosin praktika sipas kësaj. Kërkesat e Bullgarisë ndahen edhe nga Polonia, Hungaria dhe Sllovakia", theksoi Donev.
Ministri i Bujqësisë, Yavor Gechev, tha se vendimi do të hyjë në fuqi që nga 24 prilli dhe do të jetë i vlefshëm deri më 30 qershor.
Krahas grurit, në listën e 'ndalesave' u përfshinë edhe importi i vajit të lulediellit, misrit, mjaltit, qumështit, qumështit pluhur, arrës, lajthisë, vezës, pulës, mishit të derrit dhe të qengjit, thekrës, verës, uthullës dhe disa produkteve të tjera.
