Anëtarësimi i Bosnjë e Hercegovinës në Bashkimin Evropian dhe NATO është një interes strategjik, pra një garanci e stabilitetit dhe rrjedhimisht e përparimit ekonomik, tha Ministri i Shtetit për Komunikacione dhe Transport Edin Forto gjatë një takimi me të dërguarin special të Shteteve të Bashkuara të Amerikës për Ballkani Perëndimor, Gabriel Escobar.
“Investimet thelbësore dhe projektet infrastrukturore kërkojnë stabilitet politik dhe ekonomik, ndërsa prodhimi i vazhdueshëm i krizave politike, përveç populizmit të lirë, vetëm dëmton të gjithë qytetarët e Bosnjë-Hercegovinës”, tha Forto gjatë një takimi të mbajtur në Departamentin e Shtetit në Uashington.
I dërguari special Escobar theksoi se Shtetet e Bashkuara të Amerikës mbetet mik dhe partner i fortë i Bosnjë-Hercegovinës, të gatshëm për të mbrojtur Marrëveshjen e Dejtonit, integritetin e saj territorial dhe institucionet e saj.
Ai theksoi se ShBA-ja do të vazhdojë bashkëpunimin intensiv me institucionet e Bosnjë-Hercegovinës për të realizuar reformat e nevojshme për vazhdimin e integrimeve euroatlantike.
I dërguari amerikan deklaroi se problemi i Bosnjë-Hercegovinës nuk është i natyrës etnike, por reflektohet në korrupsionin sistemik, të cilin prej shumë vitesh po përpiqet ta mbulojë duke sajuar kriza. Prandaj, siç theksoi ai, reformat në fushën e sundimit të ligjit luajnë një rol vendimtar për të gjitha vendet e Ballkanit Perëndimor, zbatimi i të cilave është detyrim në rrugën drejt anëtarësimit në Bashkimin Evropian.
“Për procese të tilla nevojiten gjenerata të reja liderësh, siç e shohim tashmë mes jush, të cilët do të fokusohen në zhvillimin dhe forcimin e ekonomisë së gjithë rajonit, në të cilin do të keni mbështetjen e ShBA-së”, përfundoi Escobar.
