Me kërkesë të autoriteteve kosovare, organizata ndërkombëtare policore – INTERPOL ka lëshuar urdhërarrest për Milan Radoiçiqin, i dyshuar si organizator i sulmit terrorist të 24 shtatorit në fshatin Banjska të Komunës së Zveçanit. Ministri për Komunitete dhe Kthim në Qeverinë e Kosovës, Nenad Rashiq, ka konfirmuar për Anadolu se INTERPOL-i ka lëshuar urdhërarrest për Milan Radoiçiqin.
"Urdhri është lëshuar. Ministria e Punëve të Brendshme e Kosovës ka paraqitur kërkesë në INERPOL përmes UNMIK-ut (Misionit të Bashkimit Evropian për Sundim të Ligjit në Kosovë (UNMIK)", tha Rashiq.
Kosova ende nuk është anëtare e INTERPOL-it dhe urdhërarrestet ndërkombëtare lëshohen nëpërmjet UNMIK-ut.
Millan Radoiçiq fillimisht u arrestua nga autoritetet serbe, por, më vonë, Gjykata e Lartë në Serbi njoftoi se ka hedhur poshtë propozimin e Prokurorisë së Lartë Publike në Beograd për të caktuar paraburgim për Millan Radoiçiqin, i cili pranoi se organizoi sulmin ndaj policisë së Kosovës më 24 shtator.
Njëkohësisht, të pandehurit iu caktua masa e ndalimit për t'u larguar nga Serbia. Me këtë masë, i është marrë pasaporta dhe i është ndaluar të dalë nga territori i Serbisë pa pëlqimin e gjykatës. Gjithashtu, të pandehurit i është ndaluar të shkojë në territorin e Kosovës si dhe është urdhëruar që çdo datë 1 dhe 15 të muajit të paraqitet në stacionin policor kompetent.
Nga sulmet e 24 shtatorit në Banjska humbi jetën polici kosovar Afrim Bunjaku.
