Krerë të institucioneve të shtetit, deputetë, kryetarë komunash, ambasadorë të vendeve të huaja në Kosovë dhe anëtarë të familjes heroike Jashari, kanë marrë pjesë në seancën solemne për nder të 26-vjetorit të Epopesë së Ushtrisë Çlirimtare të Kosovës (UÇK).
Krerë të institucioneve të vendit e vlerësuan lart sakrificën e familjes Jashari dhe të komandantit legjendar Adem Jashari për çlirimin e Kosovës. Pas intonimit të himnit shtetëror dhe atij kombëtar, artistë të njohur të Kosovës performuan këngë të njohura kushtuar themeluesit të UÇK-së, Adem Jasharit, dhe vdekjes së tij për lirinë e Kosovës.
Presidentja e Kosovës, Vjosa Osmani, në fjalën e saj tha se Kosova çdo mars kujton luftën e lavdishme të UÇK-së për lirinë e popullit kosovar. Ajo tha se vdekja e Adem dhe Hamëz Jasharit dhe familjeve të tyre është ngulitur në themelet e shtetit të Kosovës.
"Rrugëtimi ynë ka qenë i mundimshëm, rruga jonë përplot sfida, por përmes gjithë kësaj ne dolëm fitimtarë falë sakrificës së luftëtarëve tanë. Liria dhe pavarësia jonë janë gjëja më e shtrenjtë që kemi trashëguar nga ta dhe të shenjta po aq sa heronjtë tanë, gjaku i të cilëve qëndron në themelet e Republikës sonë. Epopeja e UÇK-së përcaktoi fatin tonë si popull dhe si shtet, ajo ishte një epope e dinjitetit, lirisë dhe krenarisë tonë me të cilën me këmbëngulje dhe qëndrueshmëri të jashtëzakonshme u dëshmua se liria nuk ka çmim që ne nuk jemi të gatshëm ta paguajmë", theksoi Osmani.
Kryeministri i Kosovës Albin Kurti ka thënë se komandanti i UÇK-së Adem Jashari, e ka hisen më të madhe në historinë e kombit, duke thënë se liria e tij individuale "e kishte përbashkuar kombin e tij deri në vdekje".
Kurti vlerësoi se rezistenca e familjes Jashari në Prekaz ishte e paparë në histori.
"Sot në Republikën e Kosovës, liria për të cilën luftoi deri në vdekje Adem Jashari është bërë paradigma bazë e jetës dhe ligjeve të një shoqërie moderne. Vitin e kaluar shënuam 25-vjetorin e Eposit të UÇK-së dhe këtë vit po shënojmë 25 vjet nga çlirimi i Kosovës, në qershor të vitit 1999, duke kujtuar betejat e Ushtrisë Çlirimtare të Kosovës, vrasjet, masakrat dhe spastrimin etnik të kryer nga Serbia e udhëhequr nga një regjim gjenocidal mbi shqiptarët në Kosovë dhe me ndihmën e aleatëve me të cilët u çliruam së bashku 25 vjet më parë", tha Kurti.
Kryetari i Kuvendit të Kosovës, Glauk Konjufca, tha se familja Jashari u sakrifikuan kolektivisht për liri dhe kështu i siguruan vetes jetën e përjetshme.
"Epopeja e UÇK-së" është një manifestim që tradicionalisht mbahet më 5, 6 dhe 7 mars, në kujtim të komandantit të UÇK-së, Adem Jashari dhe 55 anëtarëve të familjes së tij, të cilët u vranë në një sulm nga forcat speciale të policisë serbe në mars të vitit 1998.
