Me iniciativën e nxënësve të shkollave të mesme në Kroaci, të premten do të bojkotohen furrat dhe produktet e bukës.
Konkretisht, pakënaqësia për rritjen e çmimeve të produkteve të bukës, rënies së peshës dhe cilësisë, si dhe moslëshimi i faturave, çuan në nismën e nxënësve të shkollave të mesme. Propozimi i gjimnazistëve mori mbështetjen e një numri të madh qytetarësh kroatë.
Kështu, platforma “Përshëndetje, Inspektor”, e cila në periudhën e kaluar ka organizuar tre bojkote radhazi ditëve të premte, u bëri thirrje qytetarëve që kësaj radhe të bojkotojnë furrat e bukës dhe dyqanet.
"Të mbështesim iniciativën e gjimnazistëve. Të bojkotojmë blerjet në furra buke dhe dyqane: bukë, burek, brumë, donut dhe produkte të tjera buke. Le të ndalojmë blerjet për një ditë. Ky është rezultat i paralajmërimeve tuaja të vazhdueshme dyvjeçare për rritjen enorme të çmimeve të bukës, brumit, brumërave, donutëve... Si dhe uljes së peshës (shrinkflacion), cilësisë dhe mos lëshimit të faturave”, thonë nga Platforma.
Siç thanë ata, bojkoti është edhe rezultat i pakënaqësisë së konsumatorëve për shkak të mosveprimit të organeve shtetërore, të cilat kanë heshtur dhe kanë parë teksa konsumatorët dëmtohen nëpër furra buke dhe dyqane që nga ulja e TVSh-së për bukën, vezët, vajin dhe produktet e tjera.
"Të rinjtë na kanë bërë thirrje t'i mbështesim në nismën e tyre. Prindër, gjyshër, të afërm, miq - le të mbështesim rininë tonë. Nuk bëjmë pazar të premten më 14 shkurt", është mesazhi në faqen "Përshëndetje Inspektor".
Ndryshe, një bojkot 7-ditor i blerjeve është duke u zhvilluar në Kroaci ndaj një prej zinxhirëve të shitjes me pakicë të zgjedhur nga qytetarët.
Qeveria kroate e ka zgjeruar listën e “çmimeve të mbyllura” nga 30 në gjithsej 70, por qytetarët i kanë cilësuar të pamjaftueshme këto lëvizje, si dhe vendimet e zinxhirëve të shitjes me pakicë për uljen e çmimeve të qindra produkteve, si dhe njoftimin se do ta bëjnë për mijëra të tjera.
