Osmani: Nga vendimet e BE-së varet stabiliteti i Ballkanit Perëndimor

Në kuadër të Forumit të Prespës për Dialog (FPD) u mbajt sesioni "Ndërtojmë së bashku siguri të qëndrueshme evropiane", raporton Anadolu Agency (AA).

Ministri i Punëve të Jashtme i Maqedonisë së Veriut, Bujar Osmani, kishte fjalën hyrëse në këtë sesion, ku foli mbi agresionin ushtarak rus në Ukrainë, si dhe për rëndësinë e integrimit të vendeve të Ballkanit Perëndimor në Bashkimin Evropian (BE).

Osmani tha se çështja e Ukrainës nuk ka të bëjë vetëm me sovranitetin kombëtar dhe integritetin territorial të një vendi, por edhe me mbrojtjen e Evropës nga ndikimi i palëve të treta.

Duke folur për procesin integrues të Ballkanit Perëndimor në BE, Osmani tha se rajoni kufizohet vetëm me vende anëtare të BE-së, andaj sipas tij, fjala e duhur për t'u përdorur është kompletimi i BE-së, e jo zgjerimi i saj.

Gjithashtu, ai tha se integrimi është një çështje gjeostrategjike, pasi siç theksoi ai, Ballkani Perëndimor paraqet derën hyrëse për në Evropë në shumë aspekte, duke përmendur këtu çështjen e diversifikimit energjetik, çështjen e migrimit, lidhjen me Azinë Qendrore apo me Afrikën.

"BE së shpejti do të duhet të marrë vendime. Për perspektivë të qartë nevojiten pozicione të qarta. Stabiliteti i Ballkanit Perëndimor varet nga kjo. Nëse përsëriten të njëjtat mesazhe si vitet e fundit, do të jetë një sinjal i gabuar dhe i dëmshëm. Ballkani Perëndimor, si rajoni më i afërt, është i një rëndësie vendimtare për Evropën dhe besueshmëria e Evropës është në rrezik në vazhdën e ngjarjeve dramatike që po shpalosen në Ukrainë", tha Osmani.

Ai u shpreh se BE është udhëkryq dhe nëse e le jashtë Ballkanin Perëndimor tani, BE do të jetë ajo që do të humb më shumë.

Osmani gjithashtu tha se rajoni është duke u bërë një faktor i rëndësishëm në komunitetin ndërkombëtar, duke përmendur edhe kryesimin e Maqedonisë së Veriut me OSBE-në vitin e ardhshëm.

- Maqedonia e Veriut është mirë e përgatitur për të marrë kryesimin e OSBE-së

Gjatë sesionit, fjalim kishte edhe Sekretarja e Përgjithshme e OSBE-së, Helga Maria Schmid, e cila foli mbi rolin e organizatës që ajo udhëheq, sidomos në raport me luftën në Ukrainë.

Ajo tha se OSBE është krijuar për të ulur shanset për konflikt. Megjithatë, siç u shpreh ajo, konflikte kanë ndodhur, po gjithashtu në bazë ditore organizata punon për të parandaluar konflikte të reja.

"Megjithatë, ja ku jemi përball me realitetin e rëndë të luftës. Dhe kjo është e paprecedentë. Nuk do të doja ta krahasoja këtë me asgjë tjetër, sepse kjo është një luftë krejtësisht e paprovokuar, e pajustifikuar, e paligjshme që u nis nga një shtet pjesëmarrës kundër një shteti tjetër, duke sjellë pasoja të rënda", tha Schmid.

Ajo theksoi se Rusia dhe Ukraina janë të dyja pjesë e OSBE-së, duke shtuar se përskaj përpjekjeve për bashkëpunim dhe dialog, Rusia dhe presidenti rus Vladimir Putin zgjodhën forcën.

Schmid gjithashtu u shpreh e bindur që Maqedonia e Veriut është mirë e përgatitur për të marrë kryesimin e OSBE-së vitin e ardhshëm.

Gjatë sesionit, fjalime gjithashtu kishin ekspertë dhe kryediplomatë nga vende të ndryshme.