Në qytetin e Prizrenit është mbajtur një ceremoni me rastin e 24 Nëntorit - Ditës së Mësuesit.
Në ngjarjen që u organizua në bashkëpunim me Ambasadën e Türkiyes, Partinë Demokratike Turke të Kosovës (KDTP), morën pjesë ambasadori turk në Kosovë, Sabri Tunç Angılı, konsulli i përgjithshëm i Prizrenit, Celal Doğan, ministri i Zhvillimit Rajonal, njëherësh kryetari i KDTP-së, Fikrim Damka, deputetët e KDTP-së, Fidan Brina Jılta dhe Enis Kervan, kryetari i Shoqatës së Mësimdhënësve Turk të Kosovës (KTÖD), Erol Kala, si dhe përfaqësues të institucioneve turke dhe mësimdhënës.
Në fjalën e tij në ngjarje, ambasadori Angılı tha se mësuesit turq të Kosovës kanë dhënë dhe vazhdojnë të japin kontribut të madh për shoqërinë dhe gjeneratat e ardhshme. Ai tha se është shumë e rëndësishme që arsimi turk të vazhdojë në Kosovë.
“Në mënyrë që komuniteti turk i Kosovës të ekzistojë përgjithmonë në këto troje, është thelbësore që gjuha turke dhe kultura turke të mbijetojnë dhe në mënyrë që kjo të mbijetojë, detyra juaj si mësues në arsimin turk është jashtëzakonisht e rëndësishme. Ju po e ushtroni jo vetëm një profesion, por edhe një detyrë të madhe kombëtare”, tha ambasadori turk.
Ministri Damka, nga ana e tij, tha se do të vazhdojnë të ofrojnë të gjithë mbështetjen për vazhdimin e arsimit turk në Kosovë, duke shtuar se “ekzistenca e turqve kosovarë varet nga arsimi turk”.
Kala, kreu i shoqatës KTÖD, si dhe këshilltari për arsim në Ambasadën e Türkiyes në Kosovë, Veysel Erdel, gjithashtu mbajtën fjalime dhe uruan mësuesit turq të Kosovës për Ditën e Mësuesit.
Pas fjalimeve, të ftuarve iu shtrua një darkë me rastin e 24 Nëntorit, ndërsa ceremonia u mbyll me një foto të përbashkët.
Arsimi turk në Kosovë
Në periudhën e ish-Jugosllavisë, me vendimin e marrë në vitin 1951, u vendos që të hapen shkolla ku do të zhvillohet mësim në gjuhën turke për minoritetin turk që jeton në territorin e Kosovës.
Në vitin shkollor 1951-1952 fëmijët filluan të regjistrohen edhe në shkollat fillore dhe ato të mesme për të mësuar turqishten dhe në këtë vit shkollor u hapën shkollat e para fillore turke në qytetet e Prizrenit, Prishtinës, Gjilanit, Mitrovicës dhe Pejës, si dhe në fshatrat Mamushë dhe Dobërçan.
Deri në vitin shkollor 1955-1956, në 12 shkolla fillore tetëvjeçare në 109 paralele ishin 3.558 nxënës dhe 134 mësues.
Mësimi turk në Kosovë vazhdon edhe sot në shkollat e rajonit të Prizrenit, Prishtinës, Mamushës, Vushtrrisë, Gjilanit dhe Dobërçanit.
Përveç kësaj, ka departamente turke në nivelet baçelor dhe master në Universitetin e Prishtinës dhe në atë të Prizrenit.
