Serbia dëshiron të forcojë bashkëpunimin në fushën e inovacionit dhe teknologjive të reja me kompaninë ruse Rosatom, deklaroi Aleksandar Vuçiq gjatë takimit me drejtorin e përgjithshëm të kësaj kompanie, Aleksej Lihachev, të enjten.
Presidenti i Serbisë në Instagram shkroi se me Lihachev diskutoi për çështje me rëndësi strategjike, përfshirë bashkëpunimin mes Serbisë dhe Rusisë në fushën e “sigurisë energjetike dhe bërthamore”.
Ata biseduan gjithashtu për çështje gjeopolitike, tha Vuçiq.
Ai theksoi se gjatë takimit u nënvizua “rëndësia e stabilitetit, paqes dhe dialogut në marrëdhëniet ndërkombëtare”.
“Vura në dukje se Serbia, si një vend ushtarakisht neutral, synon të ndërtojë marrëdhënie të bazuara në respekt të ndërsjellë dhe përparim ekonomik, si dhe shpreha gatishmërinë për ta forcuar bashkëpunimin në fushën e inovacionit dhe teknologjive të reja”, deklaroi Vuçiq.
