Hamami i ndërtuar në shekullin e 18-të në qytetin e Mitrovicës, në pjesën veriore të Kosovës, është nxjerrë në shitje nga pronari i saj.
I ndërtuar nga Sylejman Pashë Berisha dhe djali i vëllait të tij, Zejnullah Bej Berisha, në shekullin e 18-të, hamami u shërbeu banorëve të Mitrovicës për qëllimin e saj origjinal deri në vitin 1959 dhe më pas si muze i qytetit deri në vitin 2009. Hamami, që daton nga periudha osmane, iu kthye në pronësi trashëgimtarëve të familjes Berisha në vitin 2009.
Vepra historike, e cila aktualisht është në gjendje jo të mirë dhe një pjesë e së cilit funksionon edhe si restorant, u nxor në shitje bashkë me 15 ari truall rreth objektit.
Afrim Berisha, një nga pronarët e hamamit, tha për Anadolu se institucionet shtetërore kanë investuar rreth 90 mijë euro në punë në vitin 2022, por plumbi i kulmit të hamamit është vjedhur disa herë me radhë.
Berisha tha se ishin të interesuar që hamami, të cilin e nxorën në shitje pas vështirësive të ndryshme që përjetuan me mbajtjen e tij në gjendje të rregullt, të blihej dhe të mbrohej nga institucionet shtetërore.
Në reklamat e shpërndara për shitje u bë e ditur se pronarët kërkonin të paktën 1 milion e 600 mijë euro për objektin historik të periudhës osmane.
Sipas ligjit të Kosovës, trashëgimia kulturore e mbrojtur mund të shitet vetëm brenda kufijve të Kosovës dhe në përputhje me legjislacionin aktual që rregullon çështjet pronësore.
Ministria e Kulturës, e Rinisë dhe e Sportit e Kosovës e ka prioritet blerjen e veprave sipas çmimit të tregut, që vlerësohet nga një komision i pavarur që krijohet nga Këshilli i Kosovës për Trashëgimi Kulturore. Ministria në fjalë nuk ka dhënë ende asnjë deklaratë nëse janë të interesuar për blerjen e hamamit.
