Bisedimet për armëpushimin në Gaza pritet të rifillojnë në ditët në vijim, tha sot Sekretari amerikan i Shtetit Antony Blinken.
Duke folur në një konferencë shtypi në Doha me kryeministrin e Katarit Mohammed bin Abdelrahman Al-Thani, Blinken tha se negociatorët për Gazën do të mblidhen "së shpejti".
"Ne folëm për opsionet për të përfituar nga ky moment dhe hapat e ardhshëm për të çuar procesin përpara dhe unë parashikoj që negociatorët tanë të mblidhen në ditët në vijim", shtoi ai.
Kryediplomati amerikan tha se Uashingtoni "kundërshton çdo përpjekje për të vendosur rrethim dhe për të lënë në uri banorët e Gazës".
Ushtria izraelite ka vazhduar ofensivën shkatërruese në Rripin e Gazës që nga sulmi i Hamasit vitin e kaluar, pavarësisht nga një rezolutë e Këshillit të Sigurimit të OKB-së që kërkon armëpushim të menjëhershëm.
Më shumë se 42.800 njerëz janë vrarë që atëherë, kryesisht gra dhe fëmijë, dhe mbi 100.500 të tjerë janë plagosur, sipas autoriteteve lokale shëndetësore.
Përpjekjet ndërmjetësuese të udhëhequra nga ShBA-ja, Egjipti dhe Katari për të arritur një marrëveshje armëpushimi në Gaza dhe shkëmbim të të burgosurve midis Izraelit dhe Hamasit kanë dështuar për shkak të refuzimit të kryeministrit izraelit Benjamin Netanyahu për të ndalur luftën.
Sulmet izraelite në Gaza kanë zhvendosur pothuajse gjithë popullsinë e territorit, krahas një bllokade të vazhdueshme që ka çuar në mungesa të mëdha të ushqimit, ujit të pastër dhe ilaçeve.
Izraeli po përballet me një padi gjenocidi në Gjykatën Ndërkombëtare të Drejtësisë për veprimet e tij në Gaza.
