Dronët e mirënjohur turq Bayraktar ende nuk kanë aterruar në Ballkanin Perëndimor. Së paku zyrtarisht asnjë shtet në rajon nuk e ka konfirmuar blerjen e kësaj fluturake pa pilot. Deri më tani shumë zyrtarë shtetërorë vetëm publikisht kanë shprehur dëshirën që afër vetes të kenë këtë lloj të dronit. Disa prej tyre edhe e kanë vizituar kompaninë Bayrak në Türkiye.
Famën e tij droni Bayraktar e mori në kohë kur forcat armatosura turke ndërhynë në Siri, kundër njësive të regjimit të Bashar al Asadit, në rajonin e qyteti të Idlibit. Veprimi i tij në Libi, Armeni dhe së fundmi në Ukrainë i ka befasuar.
Me analizën në vijim të TRT Balkan, do të shpalosë se cilat nga vendet e Ballkanit Perëndimor e dëshirojnë dronin Bayraktar.
Shqipëria në proces të blerjes së dronëve Bayraktar
Gjashtë dronë Bayraktar të armatosur pritet të jenë pjesë e Forcave të Armatosura të Shqipërisë. Kryeministri i Shqipërsië, Edi Rama, javë më parë njoftoi se gjatë vizitës së fundit në Türkiye është diskutuar blerja e dronëve në fjalë. Sipas tij, këta dronë, gjithsej 6 në numër sa planifikon t’i marrë Shqipëria, planifikohen të shfrytëzohen për qëllime të ndryshme, përshirë ndjekjen e personave të kërkuar dhe kontrollin e territorit të shtetit.
Marrëveshja në fjalë, siç deklaroi Rama, e kap vlerën e 6 milionë dollarëve.
Shqipëria nga viti 2009 është shtet anëtar i NATO-s. Përveç helikopterëve, Forcat e Armatosura të Republikës së Shqipërisë nuk disponojnë me fluturake tjetër.
Serbia këmbëngul për blerjen e Bayraktarit
Vite me radhë, publikisht krerët e Serbisë kanë shprehur gatishmërine e tyre për të blerë dronët Bayraktar. Presidenti i Serbisë, Aleksandar Vuçiq, një kërkesë të tillë e ka përsëritur edhe gjatë vizitës së fundit të presidentit turk Recep Tayyip Erdoğan në Serbi.
“Ne duam të blejmë drone Bayraktar, por edhe e gjithë bota e dëshiron, ne duhet të futemi në radhë”, tha ai në një konferencë të përbashkët për shtyp.
Vuçiq tha se Serbia është e gatshme të paguajë "më shumë para" për këto fluturake.
Sipas presidentit serb, homologu i tij Erdoğan i ka premtuar se mund t’i blejë ato.
Ushtria e Serbisë, e cila viteve të fundit është furnizuar me armë të ndryshme bashkëkohore, përpos aeroplanëve ushtarake, në asortimentin e saj disponon edhe me fluturake pa pilot të prodhimit kinez.
Osmani vizitoi kompaninë Baykar
Kosova, si shtet më i ri në rajon gradualisht është duke i ndërtuar kapacitet e veta ushtarake. Megjithatë, për blerjen e dronëve Bayraktar, asnjë zyrtar shtetëror nuk ka folur deri më tani. Presidentja e shtetit Vjosa Osmani, gjatë qëndrimit zyrtar në Türkiye, në shkurt të këtij viti vizitën e filloi nga kompania Baykar.
Duke postuar fotografi me drejtuesit e kësaj kompanie, ajo tha se fabrika e për prodhimin e dronëve “Bayraktar”, është një rrëfim inspirues për arritjet në sferën e avancimit teknologjik dhe inovacionit të ndërlidhur me sektorin e mbrojtjes dhe të sigurisë. Kësisoj, ajo nuk dha detaje shtesë se vallë është arritur ndonjë marrëveshje për blerjen e këtyre dronëve ose jo.
Ushtarakë të BeH në Baykar
Vizitë të ngjashme si ajo e presidentes Osmani, në fabrikën “Baykar” këtë vit pati edhe Shefi i Shtabit të Përgjithshëm të Forcave të Armatosura të Bosnjë e Hercegovinës, gjenerallejtënant Senad Mashoviç. Por, deri më tani asnjë njoftim zyrtar nga BeH-ja nuk ka ardhur se janë furnizuar me këto drone. Aktualisht qielli i BeH-së mund të patrullohet vetëm nëpërmjet helikopterëve të forcave të armatosura.
Maqedonia e Veriut disponon me dronë izraelitë
Deklarata publike për blerjen e dronëve Bayraktar nga autoritet në Maqedoninë e Veriut deri më tani nuk janë dhënë. Droni si pajisje për herë të parë u bë e njohur në Maqedoninë e Veriut, gjatë incidentit në Lagjen e Trimave në Kumanovë, në vitin 2015.
Të burgosurit në këtë aksionin pretendonin se i gjithë aksioni policor kundër tyre është mbikëqyrur nga droni. Publikisht për çështjen e dronëve vite më parë foli ministri i Punëve të Brendshme, Naqe Çulev, i cili tha se paraardhësi i tij Oliver Spasovski, me sistemazim kishte paraparë mosekzistimin e njësisë së fluturakeve pa pilot.
Maqedonia e Veriut nga viti 2011 disponon me dronë të prodhimit izraelit Hermes.
7 Tet 2022
Bayraktar-i ende s’ka aterruar në Ballkanin Perëndimor!
Shqipëria dhe Serbia nga vendet e rajonit janë më të zëshmet rreth blerjes së dronëve pa pilot Bayraktar nga Türkiye.
TRT Balkan
Lajme të ngjashme
Artikujt në këtë kategori
Çfarë tjetër do të donit të dinit?
Popullore